ПСЖ - «Барселона»: Париждегі наразылықтар аясындағы Чемпиондар лигасы матчы. LIVE-трансляция
20 қазаннан 21 қазанға қараған түні француздық «ПСЖ» 2026/2027 жылғы Чемпиондар лигасы маусымының жалпы кезеңіндегі үшінші тур матчында испаниялық «Барселонаны» қабылдайды, деп хабарлайды Sports24.kz.
Кездесу Париждегі «Парк де Пренс» стадионында өтеді және Қазақстан уақытымен 00:00-де басталады. Матчтың тікелей трансляциясын Qazsport телеарнасы көрсетеді.
Екі команда да екі турдан кейін алты ұпаймен өзара кездесуге келеді.
«ПСЖ» турнирді өз алаңында словакиялық «Слованды» 6:1 есебімен жеңуден бастады, кейін сырт алаңда ағылшындық «Манчестер Ситиді» 4:2 есебімен ұтты.
«Барселона» да алғашқы екі матчында жеңіске жетті. Ханси Фликтің командасы нидерландтық «Фейеноордты» 5:1 есебімен ойсырата жеңсе, екінші турда сырт алаңда түркиялық «Галатасарайдан» 4:1 есебімен басым түсті.
Қарсыластар соңғы рет 2025 жылдың қазан айында Чемпиондар лигасының жалпы кезеңі аясында кездесті. Сол жолы қонақта «ПСЖ» 2:1 есебімен жеңіске жетті.
Франциядағы наразылықтар
Францияның ішкі істер министрі Лоран Нуньес елдегі тәртіпсіздіктерге қарамастан, «ПСЖ» мен «Барселона» арасындағы Чемпиондар лигасының жалпы кезеңі матчы кейінге шегерілмейтінін мәлімдеді.
L’Équipe басылымының хабарлауынша, дүйсенбі күні Нуньес Франция премьер-министрі Себастьян Лекорнюмен бірге баспасөз мәслихатына қатысып, матчты өткізу мәселесі күмән туғызбайтынын айтқан.
Бұл мәлімдеме Франциядағы ауқымды наразылықтарға байланысты құқық қорғау органдарының күшейтілген жұмылдырылуы аясында жасалды. Наразылықтар зорлық-зомбылық, вандализм және тонау әрекеттерімен қатар жүріп жатыр.
