«Планетадағы ең үздік федерациялардың бірі»: Бублик Қазақстандағы теннистің дамуын бағалады
Қазақстандық теннисші Александр Бублик елдегі теннистің дамуы туралы пікір білдіріп, жас ойыншылардың жетістіктерін атап өтті, деп хабарлайды Sports24.kz.
2016 жылдың қарашасынан бері Қазақстан атынан өнер көрсетіп келе жатқан әлемнің 19-ракеткасы отандық теннистің болашағы ең алдымен өз тәрбиеленушілерімізбен байланысты деп санайды.
«Елде теннисті дамыту үшін атқарылып жатқан ауқымды жұмыс, спорт нысандарының саны және тартылып жатқан мамандардың еңбегі — мұның бәрі Қазақстан атынан өнер көрсетуге келген біз секілді легионерлердің арқасында жасалып жатқан жоқ. Мұнда өз буынын, өз ойыншыларын тәрбиелеп жатыр. Өзім ел намысын қорғай бастағаныма он жыл өткен соң, қазір бізде әлемдік рейтингтің топ-10 қатарына кіретін екі жасөспірім бар — Зангар мен Амир (Зангар Нұрланұлы және Амир Омарханов). Бұл — орасан зор, теңдессіз жетістік», — деді Бублик.
Теннисшінің пікірінше, Қазақстанда атқарылып жатқан жұмыс ұзақ мерзімді перспективада айтарлықтай нәтиже береді. Ол ұлттық федерацияның қызметіне де жоғары баға берді.
«Мен бұған дейін атап өткен сол машина Қазақстанға болашақта мол жеміс әкеледі. Амир мен Зангардан кейін, олар 30 жастан асқан кезде, жаңа ойыншылардың үлкен легі келеді. Мұның бәрі — федерацияның, елдің еңбегі. Өйткені мұндай ауқымды жұмысты атқарып, күнделікті бақылауды қажет ететін ұсақ-түйекке дейін назар аударуды іске деген шынайы сүйіспеншіліксіз қамтамасыз ету мүмкін емес. Сондықтан мен мұны планетадағы ең үздік федерациялардың бірі деп санаймын», — деді Александр.
Бұған дейін Бублик кәсіби мансабын аяқтау жоспары және осындай шешім қабылдаған кезде басшылыққа алатын критерийлері туралы айтып берген болатын.
Қазір қазақстандық теннисші Алматыда өтетін ATP-250 санатындағы турнирге дайындалып жатыр. Бубликтің екінші айналымдағы қарсыласы венгр Фабиан Марожан мен Қазақстан өкілі Тимофей Скатов арасындағы матчта анықталады.
