Рыбакинаны жеңген теннисші алғаш рет әлемдік рейтингтің топ-100 тізіміне енді

Пекиндегі турнирде қазақстандық теннисші Елена Рыбакинаны жеңген Армения өкілі Алина Чараева алғаш рет WTA рейтингінің алғашқы жүздігіне енді, деп хабарлайды Sports24.kz.

Жаңартылған рейтингте 24 жастағы спортшы 118-орыннан 98-орынға көтерілді. Бұл көрсеткіш оның кәсіби мансабындағы ең үздік нәтиже болды.

Чараева Рыбакинамен 3 қазанда Пекиндегі WTA 1000 санатындағы турнирдің екінші айналымында кездесті. Армения өкілі алғашқы сетте жеңіліп қалғанымен, кездесу барысын өзгертіп, 3:6, 6:4, 6:3 есебімен жеңіске жетті.

Келесі раундта ол британдық Сонай Карталды 6:4, 6:1 есебімен ұтты. Чараеваның турнирдегі жолы 1/8 финалда үзілді: ол қытайлық Чжэн Циньвэньге үш сетте — 1:6, 6:2, 4:6 есебімен есе жіберді.

Данияр Қайратов

Редактор

0 0 0 0 0 0