Рыбакина мен Соболенко WTA рейтингінің көшіне шыққаннан кейін алғашқы матчтарын қалай өткізді
Елена Рыбакина WTA рейтингінің бірінші сатысына көтерілгеннен кейінгі алғашқы ресми матчын өткізді. Алайда оның жаңа мәртебедегі дебюті соңғы жылдардағы басты қарсыластарының бірі Арина Соболенконың алғашқы кездесуінен мүлде өзгеше болды.
Қызығы, екі теннисші де әлемнің бірінші ракеткасы ретінде алғашқы матчын Бейжіңдегі WTA 1000 турнирінде өткізді. Айырмашылығы - үш жыл. Sports24.kz екі дебютті салыстырып көрді.
Соболенко алғаш рет WTA рейтингінің көшіне 2023 жылдың қыркүйегінде шықты. Бұл US Open-нан кейін болды. Нью-Йоркте Беларусь өкілі финалға дейін жетіп, шешуші матчта Коко Гауффқа жол берген еді.
Одан кейінгі алғашқы турнирі China Open болды. Арина әлемнің бірінші ракеткасы мәртебесіндегі алғашқы кездесуін 1 қазанда америкалық София Кенинге қарсы өткізді.
Соболенконың дебюті өте сенімді өтті. Ол Кенинді 6:1, 6:2 есебімен жеңіп, матчты небәрі 67 минутта аяқтады. Кездесу барысында Арина 22 виннер орындап, бар болғаны тоғыз еріксіз қате жіберді. Сондай-ақ қарсыласының сервисін төрт рет бұзып, бірде-бір брейк-пойнтқа мүмкіндік берген жоқ.
Бейжіңде Соболенко жеңісті сериясын жалғастырып, Кэти Бултер мен Жасмин Паолиниді де жеңді. Ол ширек финалға дейін жетті. Бір қызығы, дәл осы кезеңде оны Елена Рыбакина тоқтатты. Қазақстандық теннисші сол кезде әлемнің бірінші ракеткасын 7:5, 6:2 есебімен жеңген еді.
Үш жылдан кейін ұқсас жағдай қайталанды, бірақ бұл жолы басты рөлде Рыбакина болды.
Қазақстандық теннисші US Open-2026 турниріндегі жеңістен кейін WTA рейтингінің бірінші сатысына көтеріліп, Бейжіңге әлемнің бірінші ракеткасы әрі турнирдің бірінші нөмірлі теннисшісі ретінде келді.
Рыбакинаның жаңа мәртебедегі алғашқы қарсыласы WTA рейтингінде 118-орында тұрған Армения өкілі Алина Чараева болды.
Кездесудің басы сенсация болатындай көрінбеді. Рыбакина алғашқы сетті 6:3 есебімен жеңіп алды. Алайда кейін Чараева матчты өзгертіп, екінші партияны 6:4, шешуші сетті 6:3 есебімен өз пайдасына аяқтады. Матч 2 сағат 11 минутқа созылды.
Осылайша, Соболенко әлемнің бірінші ракеткасы ретіндегі алғашқы матчын екі сетте сенімді жеңіспен аяқтаса, Рыбакинаның дебюті бірден тарихи сенсациямен есте қалды.
WTA мәліметінше, Чараева 1975 жылдан бері әлемнің бірінші ракеткасын алғашқы сетте жеңіліп тұрып ұтқан ең төмен рейтингтегі теннисші атанды.
Осылайша, бір қала екі әлемнің бірінші ракеткасына мүлде бөлек дебют сыйлады. Соболенко үш жыл бұрын Бейжіңде сенімді жеңіспен бастап, ширек финалға дейін жетті. Ал Рыбакина дәл сол турнирге әлемнің бірінші ракеткасы ретінде келіп, алғашқы кездесуінде-ақ топ-100-ден тыс тұрған қарсыласқа сенсациялық түрде жол берді.
