Чараева Рыбакинаны жеңуге не көмектескенін айтты
Армениялық теннисші Алина Чараева мансабындағы ең ірі жеңістерінің бірінен кейін әсерімен бөлісті. Бейжіңдегі WTA 1000 турнирінің екінші айналымында әлемдік рейтингте 118-орында тұрған спортшы бірінші ракетка Елена Рыбакинаны 3:6, 6:4, 6:3 есебімен сенсациялық түрде жеңді, деп хабарлайды Sports24.kz.
Матчтан кейін Чараева болған жағдайға әлі де толық сене алмай отырғанын жасырмады. Сонымен қатар ол Рыбакинаның деңгейін ерекше атап өтіп, алғашқы сеттен кейін де матчтан қол үзбей, соңына дейін өз мүмкіндігіне сенуге тырысқанын айтты.
«Әлі де сөз табу қиын. Бұл мен үшін керемет сезім. Елена өте мықты маусым өткізіп жатыр және аса жоғары деңгейде ойнайды, сондықтан мұндай жеңістің орны бөлек. Есепке байланып қалмай, сабыр сақтауға және матчты өзгерте алатыныма соңына дейін сенуге тырыстым. Мүмкін, дәл сол сенім маған жеңіске жетуге көмектескен шығар», - деді Чараева.
24 жастағы теннисші үшін бұл мансабындағы ең ірі жеңіс болды. Бұған дейін Чараева әлемдік рейтингтің бірінші орнында тұрған қарсыласын ешқашан жеңбеген.
Кездесу Рыбакинаның басымдығымен басталды. Қазақстандық теннисші алғашқы сетті 6:3 есебімен сенімді аяқтады. Алайда кейін Чараева қарқынын күшейтіп, екінші партияны 6:4 есебімен алды. Шешуші сетте де Армения өкілі басым түсіп, 6:3 есебімен матчты өз пайдасына аяқтады.
Бұл Рыбакинаның WTA рейтингін алғаш рет басқарғаннан кейінгі алғашқы ресми кездесуі еді. Әлемнің бірінші ракеткасы мәртебесіндегі дебют қазақстандық үшін Бейжіңдегі «мыңдық» турнирдің екінші айналымындағы күтпеген жеңіліспен аяқталды.
Чараева жарыстағы өнерін жалғастырады. Келесі айналымда ол Ұлыбритания өкілі Сонай Карталмен кездеседі.
