Елена Рыбакина Бейжіңдегі WTA 1000 турниріндегі бір матч үшін қанша табыс тапты
Әлемнің бірінші ракеткасы Елена Рыбакина Бейжіңдегі WTA 1000 турниріндегі алғашқы матчынан кейін-ақ жарысты аяқтады. Қазақстандық теннисші Армения өкілі Алина Чараеваға 6:3, 4:6, 3:6 есебімен жол бергенімен, Қытай астанасынан жүлдесіз қайтпайды, деп хабарлайды Sports24.kz.
Рыбакина турнирде бірінші нөмірмен тіркелгендіктен, алғашқы айналымнан босатылып, жарысты бірден екінші кезеңнен бастады. China Open турнирінің ресми жүлде кестесіне сәйкес, осы кезеңде жарыстан шыққан теннисшілерге 36 110 доллар және 35 рейтингтік ұпай беріледі.
Осылайша, Рыбакина Бейжіңдегі бір матчы үшін 36 110 доллар табыс тапты. Бұл шамамен 16 188 647,43 теңгеге тең.
Салыстыру үшін, үшінші айналымға шыққан теннисші 61 865 доллар, төртінші кезеңге жеткен спортшы 105 720 доллар алады. Ал турнир чемпионы 1 151 380 доллар және 1000 рейтингтік ұпай иеленеді. Әйелдер арасындағы China Open жарысының жалпы жүлде қоры 9 415 725 долларды құрайды.
Рыбакинаның жеңілісі қарсыластардың рейтингтегі орнына байланысты да үлкен сенсацияға айналды. Қазақстандық теннисші әлемдік рейтингтің көшін бастап тұрса, Чараева кездесу алдында 118-орында еді. Сонымен қатар бұл Еленаның WTA рейтингінде бірінші орынға көтерілгеннен кейінгі алғашқы ресми матчы болды.
Бейжіңдегі сәтсіздікке қарамастан, 2026 жыл Рыбакинаның мансабындағы ең табысты маусымдардың бірі болып отыр. Биыл ол Australian Open, Штутгарттағы WTA 500 турнирі және US Open жарыстарында чемпион атанды.
US Open-дағы жеңістен кейін Рыбакина WTA тарихындағы әлемнің бірінші ракеткасы атанған 30-теннисші және бұл жетістікке жеткен алғашқы Қазақстан өкілі болды.
Азиядағы турнирлер сериясында келесі ірі жарыс Ухандағы WTA 1000 турнирі болмақ. Рыбакина негізгі торға Арина Соболенко, Коко Гауфф, Ига Швентек және өзге де үздік теннисшілермен бірге өтінім берді.
