Рыбакина АҚШ ашық чемпионаты қарсаңында өз жағдайы туралы айтты
Әлемнің екінші ракеткасы, Қазақстан атынан өнер көрсететін Елена Рыбакина маусымдағы соңғы «Үлкен дулыға» турнирі – US Open басталар алдында денсаулығы туралы айтты, деп хабарлайды Sports24.kz
Теннисші әзірге корттағы жаттығуларын жаңартпағанымен, алғашқы матчы үшін дайын болуға үмітті екенін жеткізді
Рыбакинаның айтуынша, жарысқа бес күн қалғанда ол әлі толыққанды корттағы жаттығуларға кіріспеген. Қазақстандық теннисші қазіргі уақытта алдыңғы турнирде алған жарақатынан айығуға көңіл бөліп жатқанын атап өтті.
«Алдыңғы турнирде аздаған жарақат алдым, сондықтан қазір бар күшімді қалпына келуге жұмсап жатырмын. Әзірге бәрі жақсы өтуде. Өкінішке қарай, кортқа әлі шыққан жоқпын. Алдағы күндері шығуға тырысамыз, бәрі дұрыс сияқты, сол себепті алғашқы матчқа дейін дайын боламын деп үміттенемін. Бұл өте маңызды», – деді қазақстандық теннисші.
Сондай-ақ Рыбакина қалпына келуді жылдамдатуға асықпайтынын айрықша атап өтті.
«Жалпы алғанда, менің қалпына келуіме он шақты күн болды, әрі дайындыққа тағы бірнеше күн бар. Матч нақты қай күні өтетініне байланысты, бірақ біз асықпаймыз. Жалпы, мен жүз пайыз дайын болу үшін асықпаймын», – деп түйіндеді Рыбакина.
Рыбакинаның жарақаты туралы не белгілі
Еске салсақ, қазақстандық теннисші Цинциннатидегі турнирдің ширек финалында польшалық Ига Швёнтекке қарсы ойында жарақат алған еді. Кейін Рыбакина аяғындағы мәселе біраз уақыттан бері мазалап жүргенін, бірақ жүктемелердің әсерінен ауырсыну күшейіп, тіпті жүре алмай қалатындай деңгейге жеткенін айтты.
US Open қарсаңында қазақстандық теннисші микст турнирінен бас тартты, бірақ Нью-Йоркке келіп, жанкүйерлерге арналған автограф сессиясын өткізді.
Рыбакина WTA рейтингінің көшбасшысы атана ала ма?
US Open қорытындысы бойынша Елена Рыбакина алғаш рет жекелей сында әлемдік рейтингте бірінші орынға көтерілуге мүмкіндік алады.
Ол үшін жартылай финалға шығу қажет. Сондай-ақ, егер Беларусьтен Арина Соболенко, америкалық Коко Гауфф пен Джессика Пегула US Open-ды жеңе алмаса, қазақстандық теннисші де бірінші орынға көтерілуі мүмкін.
Осылайша, турнирде бірде-бір матч өткізбесе де, Рыбакина әлемдік рейтингте көш бастап кетуі ықтимал сценарий бар.
US Open әйелдер арасындағы жекелей сында алғашқы матчтар 31 тамыз бен 1 қыркүйекте өтеді. Турнир финалы Нью-Йоркте 12 қыркүйекте болады.
