Көз жасы мен құсу: Джокович US Open турнирінен сенсациялық түрде ұшып кетті
«Үлкен дулыға» турнирлерінің 24 дүркін чемпионы, әлемнің бесінші ракеткасы сербиялық теннисші Новак Джокович 2026 жылғы АҚШ ашық чемпионатының екінші айналымына шыға алмады, деп хабарлайды Sports24.kz.
Турнирдегі алғашқы матчында ол ATP рейтингінде 49-орында тұрған аргентиналық Мариано Навонеден 6:7 (5:7), 7:5, 6:4, 2:6, 1:6 есебімен сенсациялық түрде жеңілді.
Кездесу 4 сағат 40 минутқа созылды. Джокович 10 эйс жасап, 10 рет қос қателік жіберді және 12 брейк-пойнттың төртеуін пайдаланды. Ал оның қарсыласы тоғыз рет эйс жасап, сегіз қос қателікке жол берді және 17 брейк-пойнттың алтауын жүзеге асырды.
Айта кетейік, матч барысында Джокович бірнеше рет дәрігерлер бригадасын шақырды. Сербиялық теннисшінің алаңда жүрегі айнып, құсқаны да байқалды. Тіпті Джоковичке дәрі ішуге тура келді.
Сонымен қатар, Навоненің пайдасына 1:3 есебі кезінде Джоковичтің көзіне жас алды. Осы сәтте Новак бір сағатқа жуық уақыттан кейін алғаш рет гейм ұтып алды.
Навоненің келесі қарсыласы Маттео Берреттини (Италия) мен Стэн Вавринка (Швейцария) арасындағы матчтың жеңімпазы болады.
US Open-2026 турнирі 30 тамыз бен 13 қыркүйек аралығында өтеді. Турнирдің қазіргі чемпионы — испаниялық Карлос Алькарас.
Тарихи жеңіліс
Джокович «Үлкен дулыға» турнирінің алғашқы айналымында соңғы рет 20 жыл бұрын жеңілген еді. 2006 жылы ол Аустралия ашық чемпионатының алғашқы кезеңінде жарыстан шығып қалған.
Сондай-ақ сербиялық теннисші 2018 жылдан бері алғаш рет әлемдік рейтингтің үздік ондығынан тыс қалады.
Джокович «Үлкен дулыға» турнирлеріндегі жеңістер саны бойынша рекорд иесі — оның еншісінде 24 чемпиондық атақ бар. Жалпы 39 жастағы спортшы ATP турнирлерінде 101 рет жеңіске жеткен.
