Джессика Бузас Манейро - Рыбакинаның US Open-2026 турниріндегі қарсыласы: рейтингі, нәтижелері және жеке кездесулері
Елена Рыбакина US Open-2026 турнирінің екінші айналымындағы қарсыласын білді. Келесі кезеңге жолдама үшін қазақстандық теннисші Испания өкілі Джессика Бузас Манейромен кездеседі.
23 жастағы испаниялық спортшы жарыстың алғашқы айналымында чехиялық Дарья Видманованы екі сетте - 6:3, 6:4 есебімен жеңді. Ал Рыбакина Нью-Йорктегі бәсекені америкалық Теа Фродинді 6:3, 6:2 есебімен ұтып бастады.
Sports24.kz әлемнің екінші ракеткасының келесі қарсыласы туралы негізгі деректерді жинады.
Джессика Бузас Манейро кім?
Бузас Манейро 2002 жылдың 24 қыркүйегінде Галисияда дүниеге келген. Қазір ол 23 жаста, бойы - 170 сантиметр. Испаниялық теннисші оң қолмен ойнайды және бэкхендті екі қолмен орындайды.
Джессика тенниспен бес жасынан айналыса бастаған. Бала кезінде Гарбинье Мугуруса мен Рафаэль Надальдың ойынын бақылап өскен. Өзі ең жақсы көретін төсеніш ретінде грунтты атайды, дегенмен шөп үстінде ойнағанды да ұнататынын айтқан.
Бузас Манейроның WTA рейтингіндегі ең жоғары көрсеткіші - 40-орын. Ол бұл межеге алғаш рет 2025 жылдың тамызында жетті. Ал 2026 жылдың тамыз айының соңында испаниялық теннисші 105-орынға түсті.
Үлкен серпілісі Уимблдонда басталды
Бузас Манейро көпшілікке 2024 жылы кеңінен таныла бастады.
Сол жылы Уимблдонның алғашқы айналымында ол турнирдің сол кездегі чемпиондық атағын қорғап жүрген Маркета Вондроушованы сенсациялық түрде жарыстан шығарды. Бұл оның әлемдік рейтингтің алғашқы ондығына кіретін теннисшіге қарсы алғашқы жеңісі болды.
Сол маусымда испаниялық спортшы Антальядағы WTA 125 санатындағы турнирде чемпион атанып, US Open жарысында үшінші айналымға дейін жетті.
2025 жылы оның нәтижелері тағы да жақсарды. Бузас Манейро мансабында алғаш рет «Үлкен дулыға» турнирінің төртінші айналымына өтті. Бұл нәтижеге ол Уимблдонда қол жеткізді. Сондай-ақ Монреальдағы WTA 1000 турнирінде ширек финалға дейін барды. Дәл осы жетістіктер оның әлемдік рейтингтің топ-40 қатарына енуіне мүмкіндік берді.
2026 жылы Коко Гауффты да жеңді
Биылғы маусым испаниялық теннисші үшін бірқалыпты өтіп жатқан жоқ. Дегенмен оны осал қарсылас деуге келмейді.
2026 жылдың басында Бузас Манейро мансабындағы ең ірі жеңістерінің біріне қол жеткізді. United Cup турнирінде ол сол сәтте WTA рейтингінің алғашқы бестігіне кірген америкалық Коко Гауффты 6:1, 6:7, 6:0 есебімен жеңді.
Соған қарамастан, испаниялық спортшыға тұрақтылық жетіспей келеді. Тамыз айының соңындағы мәлімет бойынша, оның биылғы жеңіс пен жеңіліс көрсеткіші 18–24 болды. Ал негізгі WTA турындағы чемпиондық атағы әзірге жоқ.
Тамыз айын қалай өткізді?
US Open алдындағы соңғы ай Бузас Манейро үшін өте қарқынды өтті.
Тамыздың басында ол Торонто турниріне қатысып, бірінші айналымнан өтті. Кейін үш сетке созылған кездесуде Элина Свитолинаға жол берді.
Одан кейін Цинциннатиде өнер көрсетті. Алғашқы матчында Анна Бондарды 6:3, 7:6 есебімен жеңгенімен, келесі кезеңде Катержина Синяковаға үш сетте есе жіберді.
US Open қарсаңында Бузас Манейро Филадельфиядағы турнирге де қатысты. Онда Элла Зайдельді 6:4, 6:2 есебімен жеңіп, кейін Ван Синьюйге 6:4, 4:6, 2:6 нәтижесімен ұтылды.
Ал Нью-Йорктегі жарысты қайтадан жеңіспен бастап, Видманованы екі сетте жарыстан шығарды.
Рыбакина онымен бұған дейін кездескен
Алдағы матч Рыбакина мен Бузас Манейро арасындағы алғашқы кездесу болмайды.
Қос теннисші 2024 жылдың желтоқсанында United Cup турнирінде бір-біріне қарсы ойнаған. Сол кездесуде Рыбакина сенімді түрде 6:2, 6:3 есебімен жеңіске жетті.
Осылайша, жеке кездесулердегі есеп әзірге 1:0 - Қазақстан өкілінің пайдасына.
Матч қашан өтеді?
Рыбакина мен Бузас Манейро арасындағы кездесу 3 қыркүйекке жоспарланған. Матч US Open-2026 турнирінің екінші айналымы аясында өтеді.
Қазақстандық теннисші үшін бұл - испаниялық қарсыласын екінші рет жеңіп, маусымның соңғы «Үлкен дулыға» турниріндегі жорығын жалғастыруға мүмкіндік.
