Бублик US Open-2026 турнирінің екінші айналымына шықты
Қазақстандық теннисші Александр Бублик 2026 жылғы АҚШ ашық чемпионатын сәтті бастады, деп хабарлайды Sports24.kz.
Бірінші айналымдағы матчта әлемнің 16-ракеткасы ATP рейтингінде 253-орында тұрған америкалық Джей-Джей Вольфпен кездесті. Бублик төрт сетте 6:4, 6:2, 3:6, 6:1 есебімен жеңіске жетті. Матч 2 сағат 13 минутқа созылды.
Қазақстандық теннисшінің еншісінде 15 эйс және сегіз қос қателік бар. Бублик жеті брейк-пойнттың бесеуін пайдаланды. Ал Вольф төрт эйс жасап, үш рет қос қателікке жол берді және брейк жасауға берілген сегіз мүмкіндіктің үшеуін жүзеге асырды.
Нью-Йорктегі матчқа дейінгі жеке кездесулерде Вольф 3:1 есебімен басымдыққа ие болған еді. Теннисшілер соңғы рет 2023 жылы Уимблдонның екінші айналымында кездескен. Сол жолы Бублик жеңіске жеткен.
Бубликтің келесі қарсыласы кім болады?
US Open-2026 турнирінің екінші айналымында қазақстандық теннисші аргентиналық Тьяго Аугустин Тиранте мен француз Адриан Маннарино арасындағы матчтың жеңімпазымен кездеседі.
US Open турнирінің қазіргі чемпионы — испаниялық Карлос Алькарас. 2026 жылғы турнирдің негізгі кезеңі 30 тамыз бен 13 қыркүйек аралығында өтеді.
