«Жолақтарға таласу керек»: Азия чемпионы Земс Азия ойындарына дайындық жағдайына шағымданды
Қазақстандық жеңіл атлет Аделина Земс Жапонияның Нагоя және Айти қалаларында өтетін Азия ойындарына дайындық барысында қиындықтарға тап болды, деп хабарлайды Sports24.kz.
Маусымның басты құрлықтық турнирінің басталуына бір айдан аз уақыт қалды, алайда жабық кешендегі Азияның төрт дүркін чемпионы дайындықты өз сөзімен айтқанда қолайсыз жағдайда өткізуге мәжбүр болды.
27 жастағы спортшы Қарағанды облысының намысын қорғайды. Өзінің Instagram парақшасында Земс аймақта қолжетімді стадион болмағандықтан, жүгіру жаттығуларын манежде өткізуге мәжбүр екенін айтты. Оның айтуынша, толыққанды дайындалу оңай емес: жүгіру жолақтарын басқа келушілермен, оның ішінде балалармен бөлісуге тура келеді, ал жаттықтырушы әрдайым қасында бола бермейді.
«Менің барлық қарсыластарым стадионда еркін жаттығып жатқанда, мен облыста стадион болмағандықтан манежде жүгіруге мәжбүрмін. Жолақтарға таласу керек, балалар жүріп кедергі келтіреді, жаттықтырушы да жанымда жоқ. Міне, осындай жағдай», — деді Земс.
Спортшының өтініші Қазақстанның жеңіл атлетика федерациясының назарын аудартты. ФЛАРК Земстің дайындық жағдайын бақылауға алып, оның әрі қарайғы жаттығу процесіне қатысты жедел шешім қабылдағанын мәлімдеді.
Федерацияның түсіндіруінше, қазіргі таңда Қарағандыдағы «Шахтер» стадионында жөндеу жұмыстары жүргізілуде. Сол себепті спортшы уақытша жеңіл атлетика манежінде жаттығып жүр, алайда онда жүгіру жолақтарын еркін пайдалану қиындық туғызды.
Земске Азия ойындарына сапалы дайындық жасау үшін 27 тамыздан бастап ол жаттығуларын Астанадағы Қазақ ұлттық спорт университетінің базасында жалғастырады. Елордада жеңіл атлет 6 қыркүйекке дейін дайындалады.
Одан кейін Земс Қазақстан ұлттық құрамасымен бірге Жапонияның Окаяма қаласына жол тартады. Онда команда Азия ойындары басталмас бұрын соңғы оқу-жаттығу жиынын өткізеді.
Бұған дейін, 2–22 тамыз аралығында, Қазақстанның жеңіл атлетика құрамасы Алматыда дайындық жиынын өткізген болатын. Қазір спортшылар бекітілген дайындық жоспарына сәйкес қысқа мерзімді үзіліс алды.
Федерация ұлттық құраманың дайындығы аясында оқу-жаттығу жиындары, спорттық тамақтану, витаминдеу және қажетті экипировкамен қамтамасыз ету қарастырылғанын айтты. Ал Қазақстанның жеңіл атлетика құрамасының Азия ойындарына қатысатын соңғы құрамы тамыз айының соңында бекітіледі.
Аделина Земс ұлттық құраманың жүгіру және эстафета түрлеріндегі көшбасшыларының бірі саналады. Спортшы жабық кешендегі Азияның төрт дүркін чемпионы, сондықтан оның Жапониядағы жарыстарға қатысуы мен дайындығы қазақстандық жанкүйерлер үшін үлкен қызығушылық тудырады.
Енді федерация шешімінен кейін Земс дайындықтың соңғы кезеңін қолайлырақ жағдайда өткізуге мүмкіндік алып, Азия ойындарындағы өнер көрсетуге толыққанды дайындыққа назар аудара алады.
