Ясмина Токсанбаева Азия ойындарының алтынынан айырылды: Қазақстан ҰОК мәлімдеме жасады
Қазақстан Ұлттық Олимпиада комитеті World Athletics талаптарына сай келмеген спорттық аяқ киімге байланысты 2026 жылғы Азия ойындарындағы нәтижесі жойылған жеңіл атлет Ясмина Токсанбаеваның жағдайына қатысты түсініктеме жариялады, деп хабарлайды Sports24.kz
27 қыркүйекте Токсанбаева Айти–Наго қаласында өткен Азия ойындарындағы спорттық жүріс жарысында Қытай өкілдерін басып озып, қашықтықты бірінші болып аяқтады. ҰОК мәлімдемесінде жарыстан кейін World Athletics ережелеріне сәйкес жүлдегерлердің аяқ киіміне міндетті тексеру жүргізілгені айтылған.
Тексеру барысында техникалық делегаттар Токсанбаева киген аяқ киім үлгісінің халықаралық федерация мақұлдаған модельдер тізімінде жоқ екенін анықтаған. Аяқ киімнің фотосуреттері мен тиісті ақпарат ресми қорытынды алу үшін World Athletics ұйымына жіберілді. Қорытынды шыққанға дейін марапаттау рәсімі кейінге қалдырылды.
World Athletics ұйымы қазақстандық спортшы пайдаланған аяқ киім үлгісінің жарыстарға жіберілмейтінін растады. Қолданыстағы ережелерге сәйкес, мұндай жағдайда нәтиже жарамсыз деп танылады, ал қорытынды хаттамаға түзету енгізіледі.
Қазақстан ҰОК атап өткендей, World Athletics ұйымының спорттық аяқ киімге қойылатын талаптары халықаралық федерация Кеңесінің 2026 жылғы 19 наурыздағы шешімімен жаңартылып, 20 сәуірден бастап күшіне енген. Өзгерістер туралы ақпарат World Athletics мүшесі болып табылатын ұлттық федерацияларға жіберілген.
ҰОК қазіргі Азия ойындарында болған осындай жағдайға да мысал келтірді. Жеті сайысқа қатысқан ирандық Мохитзаде есімді спортшының аяқ киімін тексеру кезінде мақұлданған модельдер тізімінде жоқ үлгіні пайдаланғаны анықталған. Оның нәтижесі жойылды. Хаттамаға түзету енгізілгеннен кейін бұған дейін төртінші орында тұрған қазақстандық спортшы Алина Чистякова үшінші орынға көтеріліп, қола медаль алды.
«Бұл мәселе туындаған сәттен бастап Қазақстан ҰОК қазақстандық спортшыға қажетті қолдау көрсету, сондай-ақ апелляция беру мүмкіндігін қарастыру мақсатында World Athletics, Азия жеңіл атлетика қауымдастығымен, Азия Олимпиада кеңесімен (АОК) және Қазақстан Республикасының жеңіл атлетика федерациясымен тұрақты байланыста болып келеді», - делінген ҰОК хабарламасында.
Осылайша, Токсанбаеваның нәтижесінің жойылуына жарыс барысындағы спорттық жүріс ережесін бұзуы емес, оның аяқ киім үлгісінің World Athletics талаптарына сәйкес келмеуі себеп болған.
