Видео: UFC-дегі сирек әдіспен жеңістен кейін: Асу Алмабаев RAF-тағы дебютінде 88 секундта жеңілді
Қазақстандық файтер Асу Алмабаев Real American Freestyle лигасындағы дебютін сәтсіз өткізді. Кливлендте өткен RAF 12 турнирінде UFC өкілі америкалық Джонни ДиДжулиуспен кездесіп, алғашқы раундта мерзімінен бұрын жеңілді, деп хабарлайды Sports24.kz.
Белдесу небәрі 88 секундқа созылды. ДиДжулиус алғашқы сәттерден-ақ бастаманы қолға алып, жауапсыз он ұпай жинады. RAF ережесі бойынша мұндай басымдық белдесудің мерзімінен бұрын тоқтатылуына әкеледі. Нәтижесінде америкалық спортшы 10:0 есебімен жеңіске жетті.
Бұл Алмабаев үшін кәсіпқой күрес форматындағы алғашқы тәжірибе болды. Қазақстандық спортшының еркін күрестен мықты базасы бар, алайда кәсіби мансабының басым бөлігін аралас жекпе-жекте өткізіп, кейін UFC деңгейіне дейін көтерілді.
Ал оның қарсыласы мансабының көп бөлігін дәл күреске арнаған. 34 жастағы ДиДжулиус ұзақ жылдар бойы АҚШ-тағы студенттік күрес жүйесінде өнер көрсеткен, қазір Кливлендте бапкер болып жұмыс істейді. Таза күрес форматындағы тәжірибе айырмашылығы белдесудің алғашқы секундтарынан-ақ байқалды.
RAF регламенті бойынша кездесу екі минуттан үш раундқа созылады. Алайда балуандардың бірі қарсыласын жауырынымен кілемге түсірсе немесе он ұпай айырмасымен алға шықса, белдесу мерзімінен бұрын аяқталады. Алмабаевтың дебютінде дәл екінші жағдай орын алды.
ДиДжулиус үшін бұл RAF-тағы екінші жеңіс болды. Бұған дейін америкалық Конор Бибті де жеңген. Сонымен қатар лигада Пата Луго мен грузиялық Олимпиада чемпионы Владимир Хинчегашвилиден жеңілген.
Кливлендтегі нәтиже Алмабаевтың UFC-дегі соңғы жекпе-жегінің аясында ерекше контраст береді. Октагондағы соңғы кездесуінде қазақстандық спортшы америкалық Чарльз Джонсонмен кездесіп, үшінші раундта мерзімінен бұрын жеңіске жеткен еді.
Алмабаев қарсыласын партерге түсіріп, өте сирек қолданылатын ауырту әдісіне - «Сулоев созбасына» шықты. Джонсон беріліп, жекпе-жек мерзімінен бұрын аяқталды.
Бұл әдіс UFC тарихында өте сирек орындалған. Алмабаевқа дейін «Сулоев созбасын» промоушенде небәрі үш спортшы сәтті қолданған. Осылайша, Асу бұл әдіспен қарсыласын жеңген UFC тарихындағы төртінші файтер атанды.
UFC-дегі әсерлі жеңістен кейін Алмабаев соққы техникасы қолданылмайтын, барлығы таза күрес шеберлігіне тәуелді басқа форматта өзін сынап көруге шешім қабылдады. Алайда RAF-тағы алғашқы тәжірибесі бірінші раундтың ортасына жетпей аяқталды.
