Отбасы тойға келісімін берді: Асаубаева мен Синдаров қашан шаңырақ көтереді
Өзбекстандық гроссмейстер Жавохир Синдаровтың отбасы оның қазақстандық шахматшы Бибісара Асаубаевамен қарым-қатынасын қолдады. Спортшының атасы Комил Синдаров бұл одақты неліктен құптайтынын және жастардың үйлену тойы қашан өтуі мүмкін екенін айтып берді, деп хабарлайды Sports24.kz.
Екі танымал шахматшының махаббат хикаясы қайтадан көпшіліктің назарын аударды. Бұл жолы жұптың болашағы туралы Жавохирдің атасы сөз қозғап, отбасының олардың үйлену тойын асыға күтіп жүргенін жасырмады.
Комил Синдаровтың айтуынша, Бибісара кәсіби шахматшының өмір салтын жақсы түсінеді. Бұл әсіресе жылдың басым бөлігін шетелдегі халықаралық жарыстарда өткізетін Жавохир үшін маңызды.
«Біз бұл тойды асыға күтіп жүрміз. Жастардың бақытты отбасы құрғанын қалаймыз. Жавохир жылдың көп бөлігін сапарда өткізеді. Егер оның болашақ жары шахматтан алыс адам болса, мұндай өмір салтына бейімделу оңайға соқпайды. Ал Бибісараның өзі де жоғары деңгейде өнер көрсетеді, кәсіби спорттың барлық қиындығын жақсы біледі. Сондықтан біз олардың қарым-қатынасын толық қолдаймыз», – деді Синдаров.
Асаубаева мен Синдаровтың қарым-қатынасы қалай басталды?
Жавохир мен Бибісара бір-бірін бірнеше жылдан бері таниды. Оларды шахматқа деген ортақ қызығушылық қана емес, халықаралық жарыстардағы кездесулер де жақындастырған.
Екі спортшының арасындағы романтикалық байланыс туралы әңгімелер отбасы мүшелері ресми пікір білдірмей тұрып-ақ тарай бастаған. 2026 жылдың көктемінде жанкүйерлер шахматшылардың көпшілік алдына бірге шыққанына назар аударды. Ал жазда Асаубаева Синдаровпен бірге Париждегі Диснейлендке барған сапарынан суреттер жариялады.
Сәуір айында Жавохирдің әжесі Жамиля Синдарова олардың жай ғана дос екенін айтып, алдағы үйлену тойы туралы қауесетті растамаған еді. Алайда қазір гроссмейстердің атасы екі жастың болашақта отбасын құруы мүмкін екенін ашық айтып отыр.
Комил Синдаров немересі мен қазақстандық шахматшының қарым-қатынасы біртіндеп дамығанын да атап өтті. Оның сөзінше, ортақ қызығушылықтары мен спорттық мансаптың ерекшеліктерін түсінуі жастарға ұзақ сапарлар кезінде де бір-біріне қолдау көрсетуге көмектеседі.
«Бибісара – Қазақстан мақтан тұтатын дарынды шахматшы. Жавохирдің өз қызығушылықтарын бөлісетін жанды таңдағанына қуаныштымыз. Әрине, мұндай одақ біздің отбасыларымызды ғана емес, көршілес екі бауырлас халықты да жақындастыра түседі. Егер екеуі шаңырақ көтеруді шешсе, біз тек қуанамыз», – деді спортшының атасы.
Үйлену тойы қашан өтеді?
Туыстарының қолдауына қарамастан, үйлену тойының нақты күні әзірге белгісіз.
Отбасы жастарды асықтыруды жоспарлап отырған жоқ. Себебі қазір Жавохир бар назарын спорттық мансабындағы ең үлкен мақсаттарының бірі – шахматтан әлем чемпионы атануға аударған.
Комил Синдаровтың айтуынша, олар гроссмейстер әлемдік шахмат тәжі үшін күресін аяқтағаннан кейін ғана той мәселесіне қайта оралмақ.
«Той міндетті түрде болады. Біз оны асыға күтіп жүрміз. Бірақ дәл қазір Жавохир басты арманына жетуге күш салуы керек. Әлем чемпионы атанып, шахмат тәжін Өзбекстанға алып келген соң, тойдың дайындығына шындап кірісуге болады», – деп бөлісті Синдаров.
Екі шахматшының спорттағы жетістіктері
Жавохир Синдаров әлемдік шахматтағы жас буынның ең мықты өкілдерінің бірі саналады. 2026 жылдың сәуірінде өзбекстандық гроссмейстер Үміткерлер турнирінде 14 мүмкін ұпайдың 10-ын жинап, жеңімпаз атанды. Осы нәтижесінің арқасында ол әлем чемпионы атағы үшін таласуға мүмкіндік алды.
Бибісара Асаубаева да халықаралық аренада айтарлықтай табыстарға жеткен. Қазақстандық шахматшы блицтен үш дүркін әлем чемпионы атанған. Ал 2026 жылғы әйелдер арасындағы Үміткерлер турнирінде екінші орын иеленді.
