«Ол еркек емес әрі екіжүзді». Қазақстандық файтер өзбек нокаутшысына жеңілгеннен кейін пікір білдірді
Өзбекстанның Ташкент қаласында өткен IBA Nomad 16 турнирінде RFC-нің бұрынғы чемпионы Дастан Бекенов пен Шохжахан Ергашев арасында жекпе-жек өтті. Кездесу өзбекстандық боксшының төрешілер шешімімен жеңуімен аяқталды, деп хабарлайды Sports24.kz.
Жекпе-жектен кейін Бекенов Ергашевті қатаң сынға алды.
«Ол боксшы ретінде қолын алға шығарып, саусақтарымен көзіме тиеді. Ал менің соққыларым оның бетіне жетпей, шабуылым бұзылады. Өзің шабуылдап, кейін шегінген кезде мұндай жағдай кез келген адамның басынан өтеді, бірақ ол нақты еркек емес әрі екіжүзді. Спортшы ретінде ол жақсы, бірақ адам ретінде екіжүзді.
Мен үшін алаңдап, қолдау көрсеткен қазақстандық жанкүйерлерге алғыс айтқым келеді. Сондай-ақ жақындарыма да алғысымды білдіремін», - деді Бекенов жекпе-жектен кейін.
Айта кетейік, жекпе-жектен кейін рингте файтерлер арасында сөз қағысы болды. Бұл файтерлер командаларының қатысуымен жаппай төбелеске ұласуы мүмкін еді.
IBA Nomad 16 турнирінде Мұратбек Қасымбай, Жалғас Жұмағұлов және Бекжан «Аю» Бакиров те өнер көрсетті.
