Ербол Мырзабосынов пен ЮНИСЕФ басшысы Астанада ауқымды жүгіру шарасын жоспарлады
Туризм және спорт министрі Ербол Мырзабосынов Қазақстандағы БҰҰ Балалар қоры (ЮНИСЕФ) өкілдігінің басшысы доктор Рашед Мустафа Сарвармен кездесті, деп хабарлайды Sports24.kz.
Ербол Мырзабосынов балалар мен жасөспірімдер спортын дамытудағы ынтымақтастықтың маңыздылығын атап өтті.
«Қазақстан үшін балалар мен жасөспірімдер спортын дамыту мемлекеттік саясаттың басым бағыттарының бірі болып табылады. Біз спортты болашақ спортшыларды тәрбиелеу мүмкіндігі ретінде ғана қарастырмаймыз. Ең алдымен, бұл – балалардың денсаулығы, тәртіп және әр бала үшін тең мүмкіндік», — деді министр.
Бүгінгі таңда Қазақстанда 34,6%, яғни 1,8 миллион бала мен жасөспірім тұрақты түрде дене шынықтыру және спортпен айналысады. Ұлттық статистика бюросының мәліметінше, 2025 жылғы 1 желтоқсанға елімізде тиісті жастағы балалар мен жасөспірімдердің жалпы саны 5 312 465 адамды құрайды.
Министрлік балалардың спорттағы қауіпсіздігіне ерекше көңіл бөлуде. 2025 жылы балалардың спорттық жарыстарға қатысуына жас шектеулері енгізілді. Бұл шектеулер спорт федерацияларының ұсыныстары ескеріліп, Денсаулық сақтау министрлігімен келісіліп, халықаралық стандарттарға сәйкес әзірленген.
Қазір Қазақстанда 526 балалар мен жасөспірімдерге арналған спорт мектебі жұмыс істейді, онда шамамен 400 мың бала мен жасөспірім спортпен шұғылданады. Биылдан бастап балалар спортына бөлінетін қаржы екі есеге жуық артты.
Осыған байланысты тараптар қайырымдылық мақсатында өтетін «Astana UNICEF Race 2026» ауқымды жүгіру шарасына дайындықты жеке талқылады. Бұл шара 20 қыркүйекте Астанадағы Ботаникалық бақ аумағында өтеді.
Спорттық іс-шараға 1700-ге жуық адам, оның ішінде 1500 ересек және 200 бала қатысады деп жоспарлануда. Бағдарламада 2, 5 және 10 шақырымдық қашықтықтар қарастырылған. Жүгіру шарасын ҚР Туризм және спорт министрлігі, Қазақстан жеңіл атлетика федерациясы, Астана қаласы әкімдігі және ЮНИСЕФ өкілдігі ұйымдастырады.
Кездесу барысында ұйымдастырушылық мәселелерге, қатысушылардың қауіпсіздігін қамтамасыз етуге, балалар үшін жайлы жағдай жасауға және салауатты өмір салты мен дене белсенділігін насихаттауға ерекше көңіл бөлінді.
«Мұндай іс-шаралар азаматтарды белсенді өмір салтына тартумен қатар, қоғамды маңызды әлеуметтік бастамалар төңірегінде біріктіреді. Алда болатын жүгіру шарасы айрықша оқиғаға айналып, бұқаралық және балалар спортын дамытуға үлес қосатынына сенімдімін», — деп атап өтті Ербол Мырзабосынов.
Кездесу соңында тараптар бұқаралық спортты дамыту, балалар мен жасөспірімдердің спортпен қауіпсіз айналысуына жағдай жасау, балалардың құқықтарын қорғау мен әл-ауқатын нығайту бағытында бірлескен жұмысты жалғастыруға дайын екендіктерін білдіріп, ынтымақтастық туралы Меморандумға қол қойды.
