Ербол Мырзабосынов артық адамдар мәселесіне нүкте қойды
Қазақстан Республикасы Туризм және спорт министрлігі қазақстандық спортшыларды кешенді жарыстарға алып жүретін делегация құрамын реттейтін нормативті бекітті, деп хабарлайды Sports24.kz.
Бұл жұмыс Жоғарғы аудиторлық палатаның нұсқауы бойынша жүргізілді. Себеп 2020 жылғы Токио Олимпиадасына дайындыққа бөлінген бюджет қаражатының тиімділігін мемлекеттік аудиттеу болды.
«Тексеру барысында ұлттық делегация құрамын қалыптастыру кезінде бекітілген нақты өлшем жоқ екені анықталды: бір спортшыға қанша бапкер, дәрігер, массажист, психолог, штаб және ресми өкілдер келу керек екені белгіленбеген. Әрбір жағдайда ілесіп жүретін персонал саны жеке анықталып, бірыңғай әдістемелік негіз болмағандықтан, іссапар шығындарының негізділігін бағалау мүмкін болмады», - делінген ЖАП хабарламасында.
Аудит қорытындысы бойынша ЖАП салалық министрлікке жаттықтырушылардың, клиникалық-ғылыми топтың, штаб пен ресми тұлғалардың спортшылар санына қатысты оңтайлы арақатынасын белгілеуді тапсырды. Бұл талап Олимпиада ойындары, Азия ойындары және басқа да ірі жарыстарға қатысатын делегацияларға қатысты.
Нәтижесінде жаңа норматив 2026 жылғы 8 шілдеде туризм және спорт министрінің бұйрығымен бекітілді.
Енді делегация құрамы нақты бекітілген пропорциялар бойынша жасақталады, бұл шығындарды болжауға және бақылауға мүмкіндік береді. Сонымен қатар басымдық спортшылармен тікелей жұмыс істейтін бапкерлік және медициналық блок мамандарына беріледі.
Жалпы қабылданған шара бюджет шығындарының ашықтығын арттырып, бақылауды күшейтіп, спорт делегацияларындағы негізсіз шығындар тәуекелін азайтуға жол ашады.
