Қазақстанның дзюдодан жасөспірімдер құрамасы Эквадордағы әлем чемпионатының жартылай финалына шықты
Дзюдодан Қазақстанның жасөспірімдер құрамасы Эквадордың Гуаякиль қаласында өтіп жатқан әлем чемпионатының жартылай финалына шықты, деп хабарлайды Sports24.kz тілшісі.
Жартылай финалға дейін қазақстандық дзюдошылар микс санатында бірнеше мықты ұжымдарды ұтты. Алдымен Болгария құрамасын 4:1 есебімен сенімді түрде жеңді.
Одан кейін біздің спортшыларды турнир фавориттерінің бірі – Жапония құрамасы күтіп тұрды.
Аутсайдерлер статусына қарамастан, қазақстандық дзюдошылар тартысты белдесулер өткізіп, 4:2 есебімен жеңіске жетіп, келесі кезеңге сенсациялық жолдама алды және кем дегенде қола медальді қамтамасыз етті.
Финал жолдамасы үшін Қазақстан құрамасы енді Өзбекстанға қарсы күреседі. Егер финалға өтсе, спортшыларымыз алтын медаль үшін таласа алады.
Айта кетейік, Қазақстан әлем чемпионатында үшінші алтын медальді жеңіп алды. Адильжан Жаудинов жасөспірімдер арасында әлем чемпионы атанды. Гуаякильдегі дүбірлі додада спортшы 90 келіден жоғары салмақ дәрежесінде алтын медальға қол жеткізді.
