Қазақстан күрес федерациясының президенті қаза тапқан сарбаздардың отбасыларына қолдау білдіруге қосылды
Қазақстан күрес федерациясының президенті Еркін Оқасов Каспий теңізі жағалауындағы әскери оқу-жаттығу кезінде қаза тапқан сарбаздардың отбасыларына қолдау көрсету бастамасына қосылды, деп хабарлайды Sports24.kz.
Күрес федерациясының басшысы қаза тапқан сарбаздардың отбасылары мен жақындарына көңіл айтып, оларға сабыр мен төзім тіледі.
Сонымен қатар, Еркін Оқасов қиын кезеңде қаралы отбасыларға нақты қолдау көрсету үшін 300 миллион теңге көлемінде қаржылай көмек көрсетті. Қаражат қаза тапқан әскери қызметшілердің отбасыларына беріліп, олардың әрқайсысына қажетті қолдау көрсетуге бағытталды.
«Бұл — бәрімізге ортақ қасірет. Біз Отан алдындағы борышын өтеген азаматтарымыздан айырылдық. Қазір олардың отбасылары үшін өте қиын кезең. Менің ойымша, көңіл айтып қана қоймай, қолдан келгенше нақты қолдау көрсету маңызды. Қаза болғандардың туыстары мен жақындарына көңіл айтамын. Марқұмдардың рухы пейіште шалқысын», - деді Федерация басшысы.
Еске сала кетейік, қайғылы оқиға 24 қыркүйекте Қазақстан Әскери-теңіз күштерінің оқу-жаттығуы кезінде болды. Каспий теңізі жағалауында оқу-жауынгерлік тапсырманы орындау барысында ауа райы күрт нашарлап, жел күшейген. Соның салдарынан әскери қызметшілер тобы теңізге түсіп кеткен. Кейін Қорғаныс министрлігі 12 адамның қаза болғанын растады.
25 қыркүйек Қазақстанда аза тұту күні болып жарияланды.
Бұған дейін Sports24.kz Каспийдегі оқу-жаттығу кезінде қаза тапқан 20 жастағы Сержан Аяпберген туралы жазған болатын. Ол әскерге шақырылғанға дейін самбо және дзюдомен айналысқан, Маңғыстаудағы «Жас Батыр» спорт мектебінің тәрбиеленушісі болған, Қазақстан чемпионатының жүлдегері атанып, халықаралық жарыстарда өнер көрсеткен.
