«Жеңісті серия»: ҚХЛ «Сибирьмен» матч алдында «Барысты» атап өтті
ҚХЛ-дың ресми сайты Астананың «Барысы» мен Новосібірдің «Сибирі» арасындағы кезекті матчқа превью ұсынды, деп хабарлайды Sports24.kz.
«Сибирь» Астанада реванш ала ма?
«Барыс» үш матчтан тұратын үй сериясындағы екінші ойынын өткізеді, ал «Сибирь» қазіргі сапарындағы үш кездесудің екіншісін ойнайды. Ярослав Люзенков командасы осы маусымда Қазақстан астанасында екінші рет ойнап, 7 қыркүйекте ірі есеппен жеңілгені үшін (1:7) реванш алуға тырысады. Қазіргі таңда қонақтардың соңғы бес матчта екі жеңісі бар. «Сибирь» Астанаға Челябі қаласынан аттанды, онда жергілікті «Трактордан» басым түсті (2:1).
«Барыстың» жеңісті сериясы үш ойынға жетті. Михаил Кравец шәкірттері 30 қыркүйектен бері жеңілген жоқ. Осы аралықта олар «Нефтехимикті» (5:4 ОТ), «Спартакты» (4:3 Б) және «Авангардты» (5:1) ұтты.
Астаналықтар 16 ұпаймен Шығыс конференциясында үшінші орында тұр. Сібірлік командада бес ұпай кем, олар соңғы орындардың бірінде және плей-офф аймағынан екі ұпай қашықта орналасқан. Қонақтар жеңіске жетіп, үздік сегіздікке жақындай ала ма?
«Барыстың» қорғаушысы Логан Дэй жеке нәтижелі сериясын бес матчқа жеткізді (0+9). Астаналықтардың шабуылшылары Мэйсон Морелли (1+3) мен Тайс Томпсон (4+0) қатарынан үш ойын бойы ұпай жинап келеді. Алаң иелерінің қорғаушысы Самат Данияр мұз айдынына шықса, ҚХЛ-дегі 300-ші мерейтойлық кездесуін өткізеді.
«Сибирь» сапында шабуылшы Архип Неколенконың жеке нәтижелі сериясы төрт матчқа созылды (3+2). Егор Коршков үшін келесі ойын Лигадағы 600-ші мерейтойлық кездесу болады. Қонақтардың қорғаушысы Даррен Диц ҚХЛ-дегі 100-ші шайбасына бір қадам қалды.
ҚХЛ-дағы соңғы бес матчтағы командалар көшбасшылары
«Барыс» ҚХЛ тарихында «Сибирьді» 31 рет жеңген, ал Новосібір командасы астаналықтармен өткен 37 өзара кездесуде жеңіске жетті.
