«Ол көгершін секілді басыма бірдеңе шашып кетті»: Кравец Асетовты аяусыз сынады
«Барыстың» бас бапкері Михаил Кравец СКА-дан (3:5) жеңілгеннен кейін команда шабуылшысы Алихан Асетовтың өз үмітін ақтамағанын айтты, деп хабарлайды Sports24.kz.
– Асетов әлі де шеткі шабуылда ойнап жүрген кезде, кейін оның қосалқы орындыққа отырғанын білесіз. Асетовпен не туралы шештіңіздер? Сіз басқа құрамды ойнатып жатқанымызды айттыңыз, кейін оның негізгі құрамға енбегенін жеткіздіңіз. Мен нақтылайын: бәлкім, сіз жаңа бір үйлесім көрген боларсыз? Сіз: «Ештеңе етпейді, кейде осылай болады» дедіңіз.
– Сол сәтте жағдай осындай болды. Кейін жаттығулар және басқа да дүниелер болды. Мен сізге бәрін айтып бердім ғой. Мен де Асетовтың басқаша ойнағанын қалаймын. Ол қажетті деңгейде ойнай бастағанша, негізгі құрамға шықпайды.
– Онымен сөйлесесіз бе? Міне, Игорь Ларионов кеше Василий Глотовпен 40 минут бойы ашық сөйлескенін айтты. Бүгін Глотов екі шайба соқты, жігіт өз күшіне сенді.
– Білесіз бе, мен барлығымен сөйлесемін. Менен не естігіңіз келеді? Ешкіммен сөйлеспейтінімді ме? Мен сізбен де сөйлесіп тұрмын. 96-нөмірлі жас жігіттен (Асетовтан) маусым алдындағы дайындық кезінде бабында болуын сұрадым. Тіпті оны капитан еткім келді. Ал ол, былайша айтқанда, көгершін секілді басыма бірдеңе шашып кетті. Осы жеткілікті ме? Әлде сіз дәл осыны білгіңіз келді ме? – деді Кравец ойыннан кейін.
Айта кетейік, өткен маусымның қорытындысы бойынша Асетов 50 матчта 13 (6+7) ұпай жинап, әр ойында орта есеппен 11 жарым минуттан мұз айдынында болды. Алайда осы маусымда ол негізгі құрамдағы орнынан айырылды.
Еске салайық, «Барыс» өз айдынында петерборлық СКА-дан 3:5 есебімен жеңілді. Астаналық команда 10 ұпаймен Шығыс конференциясында бесінші орында тұр. 30 қыркүйекте Кравец шәкірттері сырт алаңда Қазанның «Ақ Барс» командасымен кездеседі.
