Кравец «Барыстың» СКА-дан өз алаңындағы жеңілісінің себептерін атады
«Барыс» бас бапкері Михаил Кравец астаналық команданың Санкт-Петербургтің СКА клубынан өз алаңында (3:5) жеңілгеніне түсініктеме берді. Бұл ойын ҚХЛ-дың тұрақты чемпионаты аясында өтті, деп хабарлайды Sports24.kz.
Алдыңғы матчтағыдай, Кравец шәкірттері бірінші кезеңді толықтай сәтсіз өткізіп, алғашқы 20 минуттан кейін үзіліске 0:3 есебімен «жанып» шықты.
«Жанкүйерлер қуантты — көп адам келіп, бізге қолдау көрсетті. Бұл өте керемет. Өкінішке қарай, тағы да сол баяғы қателіктерге жол беріп отырмыз — бірінші кезеңде. Мұндай қарсыласқа қарсы алғашқы ауысымдардан бастап тістесіп, күресіп, шайба үшін жекпе-жектерде жеңіске жету керек. Әрине, мұндай мүмкіндіктерге жол бермеу қажет.
Ал екінші және үшінші кезеңдерде, жалпы алғанда, лайықты ойын көрсеттік, бұл кезеңдердегі есеп те лайықты болды. Өкінішке қарай, мүмкіндіктерімізді пайдалана алмадық — қақпашымен бетпе-бет шығу, 2-ге 1 шабуылы, кем құрамда жақсы қашып шыққан сәтіміз болды... Осы кезеңдерде команда паспен ойнап, комбинациялар құрып, қақпаға соққылар жасап, голдар соқты... Келесі ойындарда сабыр сақтап, жұмыс істеп, жеңіске жетуіміз керек», — деп бапкердің сөзін келтіреді Sports.kz.
Осы жеңілістен кейін астаналық команда 10 ұпаймен Шығыс конференциясының бесінші орнына жайғасты. 30 қыркүйекте Кравец командасы сырт алаңда Қазанның «Барс» АК клубына қарсы ойнайды.
