Қазақстандық қорғаушы Ұлттар лигасының символикалық құрамасына енді
Қазақстан құрамасының қорғаушысы Темірлан Ерланов Sofascore аналитикалық порталының нұсқасы бойынша Ұлттар лигасының бірінші турының символикалық құрамасына енді. Қазақстандық футболшы Фарер аралдарына қарсы матчтағы ойыны үшін жоғары баға алды, деп хабарлайды Sports24.kz.
Sofascore Ұлттар лигасының бірінші турының қорытындысы бойынша символикалық құраманы таныстырды. Құрам автоматты түрде жасақталған. Оған өз позицияларында ең жоғары рейтинг алған футболшылар енді. Бағалар ойыншылардың нақты матчтағы статистикалық көрсеткіштері негізінде ғана есептеледі. Символикалық құраманың қорғаушыларының бірі Темірлан Ерланов болды.
Ерланов Фарер аралдарына қарсы ойыны үшін 9.1 деген баға алды. Бұл матчта Қазақстан құрамасының қорғаушысы 26-минутта гол соқты. Дәл осы гол ұлттық құрамаға сырт алаңдағы кездесуде жеңілістен құтылуға мүмкіндік берді. Фарер аралдары - Қазақстан матчы 1:1 есебімен тең аяқталды.
Жоғары рейтингі арқасында Ерланов танымал футболшылармен бірге турдың символикалық құрамасына енді. Құрамаға сондай-ақ Германия құрамасының қақпашысы Марк-Андре тер Штеген, хорватиялық жартылай қорғаушы Лука Модрич және Норвегия құрамасының шабуылшысы Эрлинг Холанд кірді. Турдың абсолютті көшбасшысы ең жоғары 10.0 бағасын алған финляндиялық жартылай қорғаушы Лео Уолта болды.
Еске салайық, Қазақстан құрамасы Ұлттар лигасындағы жорығын Фарер аралдарына қарсы сырт алаңдағы тең нәтижемен бастады. Бірінші турдан кейін Қазақстанның еншісінде бір ұпай бар. Фарер аралдарында да дәл сондай ұпай. C дивизионының 3-тобында үш ұпай жинаған Словакия құрамасы көш бастап тұр, ал Молдова әзірге ұпайсыз. 29 қыркүйекте Молдова - Фарер аралдары және Словакия - Қазақстан матчтары өтеді.
