ҚХЛ «Барыс» үшін алғашқы сырт алаңдағы матчтағы негізгі факторды атады
Құрлықтық хоккей лигасының (ҚХЛ) ресми сайты тұрақты чемпионат аясында Тольяттидің «Ладасы» мен астаналық «Барыс» арасындағы матчқа превью жариялады, деп хабарлайды Sports24.kz.
«Барыс» үшін алдағы кездесу төрт матчтан тұратын сырт алаңдағы серияның алғашқы ойыны болады. Астаналық команда тұрақты чемпионаттағы үш матчтан кейін төрт ұпай жинады. Алғашқы ойындарда «Барыс» 15 шайба соғып, «Сибирьді» (7:1) ойсырата жеңіп, «Салават Юлаевтан» (8:6) басым түсті. Алайда кейін «Амурдан» 1:3 есебімен жеңілді.
«Ладаның» да еншісінде төрт ұпай бар. Тольятти клубы екі күн бұрын маусымдағы алғашқы жеңісіне қол жеткізіп, Минскінің «Динамосын» 4:2 есебімен ұтты.
ҚХЛ тұрақты чемпионаттың бастапқы кезеңінде-ақ ұпай жинаудың маңыздылығын ерекше атап өтті.
«Тольяттидегі жеңіс кімнің еншісінде болады?»
«Лада» өз алаңындағы үш матчтан тұратын сериясын аяқтайды, ал «Барыс» төрт ойындық сырт алаңдағы сапарын бастайды. Тольятти командасы екі күн бұрын биылғы тұрақты чемпионаттағы алғашқы жеңісіне қол жеткізіп, Минскінің «Динамосын» 4:2 есебімен жеңіп, төртінші ұпайын алды.
«Барыс» чемпионатты өте жарқын бастап, «Сибирь» (7:1) және «Салават Юлаев» (8:6) қақпаларына жалпы саны 15 шайба соқты. Алайда кейін «Амурға» қарсы ойында (1:3) нәтижелілігі күрт төмендеді. Бұл құлдырау ұзаққа созыла ма? Әлде «Лада» қорғанысын дұрыс ұйымдастырып, аз гол өткізіп, қатарынан екінші жеңісіне жете ме?
Айта кетерлігі, астаналықтардың да еншісінде төрт ұпай бар. Екі команда да өткен көктемдегі нәтижені қайталамауға тырысады. Сол кезде «Лада» да, «Барыс» та плей-офф аймағынан тыс қалды.
Тұрақты чемпионаттың енді басталғанына қарамастан, алдағы ойын ұпай тұрғысынан өте маңызды болмақ. Өйткені маусым соңына қарай әрбір ұпайдың маңызы арта түседі. Алдағы кездесуде кім барынша көп ұпай жинайды?» — делінген лиганың жарияланымында.
Командалардың көшбасшылары
Тольятти клубының сапында қазіргі таңда ең үздік бомбардир — шабуылшы Райли Савчук (5+2).
«Барыс» құрамында командаға жаңадан қосылған шабуылшылар қатарынан үш матч бойы ұпай жинап келеді. Олар — Джастин Бэйли (3+4), Мэйсон Морелли (1+4) және Гарретт Пилон (2+3).
Өзара кездесулердегі жеңістер
«Лада» ҚХЛ тарихындағы 22 өзара кездесудің 14-інде астаналық команданы жеңген.
«Лада» — «Барыс» матчы 16 қыркүйекте Тольяттиде өтеді. Кездесу Қазақстан уақытымен 20:00-де басталады.
