«Барыс» Ресей құрамасының бұрынғы қақпашысымен 5 мың теңгеге күшейді: ол туралы не белгілі?
Астаналық «Барыс» ресейлік қақпашы Дмитрий Николаевтың командаға қосылғанын жариялады. 26 жастағы қақпашы қазақстандық клуб сапын челябілік «Трактормен» жасалған айырбас нәтижесінде толықтырды, ал қарсы тарап ақшалай өтемақы алды, деп хабарлайды Sports24.kz.
Әртүрлі БАҚ пен инсайдерлердің мәліметінше, өтемақы көлемі 1000 рубльді (шамамен 5400 теңге) құрады.
Николаев осы маусымды «Трактор» сапында бастады. ҚХЛ-дың қазіргі чемпионатында ол он матч өткізіп, алты жеңіске жетті және қақпасына бағытталған соққылардың 92,8 пайызын қайтарды. Ресейлік қақпашы бір ойынға орта есеппен 2,2 шайбадан өткізіп алды.
«Барыстың» жаңа қақпашысы туралы не белгілі?
Дмитрий Николаев 2000 жылғы 25 қаңтарда Санкт-Петербургте дүниеге келген. Қақпашы — Санкт-Петербургтің СКА жүйесінің түлегі. Ол жастар командаларынан өтіп, кәсіби деңгейде дебют жасау мүмкіндігіне ие болды.
Николаев Құрлықтық хоккей лигасында алғаш рет 2021/22 маусымында СКА сапында ойнады. Кейін ол нижнекамскілік «Нефтехимик», мәскеулік «Спартак» және «Трактор» командаларында да өнер көрсетті. Сондай-ақ мансабында Жоғары хоккей лигасындағы воскресенскілік «Химик» сапында ойнаған тәжірибесі бар.
Қақпашы мансабындағы ең сәтті кезеңдердің бірі — 2022/23 маусымы. СКА сапында ойнаған Николаев тұрақты чемпионаттың 42 матчында 30 жеңіске жетіп, соққылардың 92,9 пайызын қайтарды және маусымды сенімділік коэффициенті 1,98 көрсеткішімен аяқтады.
ҚХЛ-де ресейлік қақпашы барлығы 175 матч өткізіп, 95 жеңіске жетті. Оның еншісінде 11 «құрғақ» ойын бар.
Николаев Ресей құрамасының тарихына енді
Қақпашының ұлттық құрама сапындағы ойыны ерекше назар аударуға тұрарлық. 2022 жылғы мамырда Николаев Ресей құрамасы тарихындағы шайба соққан алғашқы қақпашы атанды.
Бұл Беларуське қарсы жолдастық кездесуде болды. Ойынның 58-минутында ресейлік қақпашы шайбаны қарсыластың бос қақпасына бағыттады. Матч Ресей құрамасының 5:2 есебімен жеңісімен аяқталды.
Сондай-ақ Николаев Ресейдің олимпиадалық құрамасына шақырылып, «Россия 25» командасында өнер көрсетті.
Николаев «Барыс» сапындағы алғашқы ойынын жексенбі, 15 қарашада өткізуі мүмкін. Астаналық клубқа қонаққа Шығыс конференциясының көшбасшысы — магнитогорскілік «Металлург» келеді.
«Адмиралды» соңғы рет жеңген «Барыс» қатарынан үш жеңілістен тұратын сериясын үзді. 25 матчтан кейін астаналық клуб 27 ұпай жинап, ҚХЛ-дың Шығыс конференциясында алтыншы орынға көтерілді.
