Нурмагомедов Двалишвили командасымен төбелескеннен кейін RAF турниріне қатысуға ресми түрде жіберілмеді: не белгілі
Ресейлік файтер Усман Нурмагомедов Мераб Двалишвилидің командасымен болған жанжалдан кейін аптаның соңына дейін босатылған күннің өзінде, Абу-Дабидегі RAF турниріне қатыса алмайды. Ұйым басшылығы бұл туралы жарыс алдындағы баспасөз мәслихатында мәлімдеді, деп хабарлайды Sports24.kz.
Лига басшысы Чед Бронштейн жағдай жақын арада шешіледі деген үмітке қарамастан, Нурмагомедовтің сенбі күні өтетін шараға келмейтінін растады.
«Жағдайдың мүмкіндігінше тезірек шешілгенін қалаймыз. Әрине, Усман сенбі күні кешке өтетін шарамызға қатыспайды», - деді Бронштейн.
Ал Мераб Двалишвили мен жанжалға қатысқан деген ақпарат тараған тағы бір ресейлік файтер Умар Нурмагомедовтің турнирге қатысатыны жөнінде әзірге түпкілікті мәлімет жоқ.
Двалишвили бразилиялық Марлон Мораеспен жекпе-жек өткізуі керек, ал Умар Нурмагомедов америкалық Юрайя Фэйбермен кездеседі. Жарияланған ақпаратқа сәйкес, екеуі де әлі қамауда отырғандықтан, баспасөз мәслихатына қатыспады.
Осы уақытта Абу-Даби полициясы оқиғаға қатысты ресми мәліметтерді жариялады. Құқық қорғау органдарының мәліметінше, он адам ұсталған: сегізі — қонақүй кіреберісінде болған төбелеске қатысы бар деген күдікке ілінгендер, тағы екеуі оқиғаны видеоға түсірген.
«Абу-Даби полициясы бұған дейін туындаған келіспеушіліктер салдарынан қонақүй кіреберісінде болған жаппай төбелеске қатысқан сегіз адамды ұстады. Сондай-ақ оқиғаны видеоға түсірген екі адам да ұсталды. Ұсталғандарға қатысты қажетті құқықтық шаралар қабылданып, кейін қолданыстағы заңнамаға сәйкес істі әрі қарай қарау үшін материалдар прокуратураға жолданды», - делінген мәлімдемеде.
Полиция оқиғаға жедел әрекет еткенін, жанжалға қатысы бар адамдарды ұстап, қоғамдық тәртіпті қамтамасыз ету үшін қажетті шаралар қабылдағанын да атап өтті. Ведомство азаматтарды заң талаптары мен қоғамдық орындардағы тәртіп ережелерін сақтауға шақырды.
