Шок: еуропалық клубтың иесі үйінің маңында атып өлтірілді
Болгар футболын өткен онжылдықтардағы қаралы қылмыстық дәуірді еске салған жан түршігерлік трагедия дүр сілкіндірді, деп хабарлайды Sports24.kz.
Болгарияның «Ботев Пловдив» футбол клубы мен ірі көлік компаниясы «ПИМК» иесі Илиян Филипов үйінің маңында басынан атылып, қаза тапты. Қылмыс 30 қыркүйекке қараған түні болған. Бұл туралы белгілі журналист-тергеуші Ромен Молина хабарлады.
Филипов аймақтағы ең бай әрі ықпалды кәсіпкерлердің бірі саналып, іскерлік ортада ауқымды байланыстарға ие болған. Қайтыс боларынан аз уақыт бұрын кәсіпкер Болгария Ішкі істер министрлігіне Пловдивтегі оқиғалардың дамуын бақылауда ұстап отырған бейресми ықпал желілері мен көлеңкелі топтар туралы ресми ескерту жолдаған.
Жергілікті БАҚ бұл кісі өлтіруді оның кәсіби қызметімен және жемқорлық схемаларын әшкерелеуге жасаған әрекеттерімен байланыстырып отыр. Құқық қорғау органдары тапсырыспен жасалған қылмыстың мән-жайын ауқымды түрде тергеп жатыр.
Бұл оқиға 1990-жылдардың соңы мен 2000-жылдардың басындағы қаралы кезеңді еске түсірді. Сол уақытта аумақ үшін болған қылмыстық соғыстардың салдарынан Болгария клубтарының оннан астам президенті қаза тапқан еді. Сол кезеңдегі ең резонансты оқиғалардың бірі — Пловдивтің тағы бір клубы «Локомотивтің» иесі Георгий Илиевтің өлтірілуі. Оны Қара теңіз жағалауындағы курорттағы мейрамханада мерген атып кеткен.
Айта кетейік, «Ботев Пловдив» — 1912 жылы құрылған Болгариядағы ең көне футбол клубы. Команда ел чемпионы атағын екі рет жеңіп, Болгария кубогын төрт мәрте иеленген.
