«Сабах» бапкері «Кім миллионер болғысы келеді?» шоуында ақша ұтып, 24 жылдан соң клубты Чемпиондар лигасына шығарды: керемет табыстың тарихы
Әзербайжандық «Сабах» командасының бас бапкері Валдас Дамбраускас клубты Чемпиондар лигасының негізгі кезеңіне шығарып, тарихи жетістікке қол жеткізді. Алайда, литвалық маманның Еуропаның басты клубтық турниріне дейінгі жолы ерекше басталды — ол «Кім миллионер болғысы келеді?» телевизиялық шоуына қатысудан басталған еді, деп хабарлайды Sports24.kz.
2002 жылы Дамбраускас 25 жасында әйгілі бағдарламаның литвалық нұсқасы — Šeši nuliai – milijonas-қа қатысты. Сол уақытта болашақ бапкер инженерлік білім алып, үшінші дивизионда футбол ойнады және кәсіби бапкерлік мансап жайлы ойлана бастаған болатын.
Телешоудан Дамбраускас 4000 лит ұтып алды. Оның айтуынша, ол жылдары бұл сома Литвадағы орташа жылдық жалақыға тең еді. Ұтысты күнделікті қажеттіліктерге жұмсаудың орнына, Дамбраускас ақшаны өз болашағына салуға шешім қабылдады.
Жүлде қаражатына ол Англияға барып, London Metropolitan University-ге оқуға түсті. Мұнда спорттық ғылым мен жаттықтырушылықты меңгере бастады. Алайда, ұтқан ақшасы бір айлық өмір сүруге ғана жетіп, Дамбраускасқа оқумен қатар қосымша жұмыс істеуге тура келді.
Оның бапкерлік жолы дәл Англияда басталды. 2007 жылы Дамбраускас «Кингсбери Лондон Тайгерс» командасының тізгінін ұстап, кейін Литваның жасөспірімдер құрамаларында жұмыс істеді. Кейін елге оралып, «Экранас» клубының бапкерлік штабына қосылды, артынан команданы өзі басқарды.
2014 пен 2017 жылдар аралығында Дамбраускас «Жальгирис» клубын жаттықтырып, екі рет Литва чемпионы атанды. Кейін мансабында РФШ, хорватиялық «Горица», «Лудогорец», «Хайдук», ОФИ, «Омония» мен венгриялық «Диошдьёр» командалары болды. «Лудогорецпен» Болгария чемпионы атанып, «Хайдукпен» Хорватия Кубогын жеңіп алды.
2025 жылдың жазында Дамбраускас «Сабахты» басқарып, үш жылдық келісімшартқа қол қойды. Қазірдің өзінде ол тарихи нәтиже көрсетіп отыр.
Әзербайжандық клуб Чемпиондар лигасы жолын бірінші іріктеу кезеңінен бастап, барлық раундтан сүрінбей өтті. Алдымен «Сабах» уэльстік «Нью-Сейнтсті» екі рет тізе бүктірді — 2:0 және 2:1. Содан соң Дамбраускастың командасы финляндиялық КуПС-ті, үшінші кезеңде даттық «Орхусты» жеңіп шықты.
Плей-офф кезеңінде «Сабахқа» қарсылас ретінде «Хапоэль Беэр-Шева» шықты. Бірінші матчта әзербайжандық команда 1:2 есебімен ұтылды, бірақ қарымта кездесуде «Сабах» нағыз шоу жасап, қосымша уақытта 5:2 есебімен жеңіске жетті. Екі ойынның қорытындысы бойынша жалпы есеп 6:4 болды.
Осылайша, «Сабах» клубы тарихында алғаш рет Чемпиондар лигасының негізгі кезеңіне шықты. Ал Дамбраускас үшін бұл мансабындағы тағы бір жарқын белес — бәрі де бір кездегі телешоудағы күтпеген жеңістен басталды.
