Роналду мен Джорджинаның үйлену тойы: жылдың басты салтанаты туралы жаңа мәліметтер
Криштиану Роналду мен Джорджина Родригестің он жылға жуық уақытқа созылған махаббат хикаясы жаңа кезеңге аяқ басты. Әлем чемпионаты аяқталғаннан кейін жанкүйерлердің назары жұптың жеке өміріне ауып, шетелдік басылымдар болашақ үйлену тойына қатысты тың мәліметтерді жариялады, деп хабарлайды Sports24.kz.
Шілде айының соңында әлеуметтік желілерде Роналду мен Джорджина 1 тамыз күні Португалияның Синтра қаласында жасырын түрде некесін қияды деген ақпарат кеңінен тарады. Бұған жабық салтанатқа арналған шақыру билеті деген суреттер себеп болды. Алайда бұл мәлімет расталмады. HOLA! басылымының жазуынша, жұптың жақын ортасы бұл қауесетті жоққа шығарған. Ал той өтеді делінген орын сол күні туристер үшін ашық болған.
Сонымен қатар бірнеше еуропалық БАҚ үйлену тойы шынымен де Криштианудың туған жері – Мадейра аралында өтетінін хабарлады. Ақпаратқа сәйкес, неке қию рәсімін Фуншал қаласындағы кафедралды соборда өткізу жоспарланып отыр. Бұл орын футболшы үшін ерекше мәнге ие, өйткені дәл осы маңда оның дүниеге келген ауруханасы мен алғашқы қадамдарын жасаған футбол алаңы орналасқан.
Роналдудың өзі бұған дейін бірнеше рет үйлену тойын әлем чемпионаты аяқталғаннан кейін өткізетінін айтқан болатын. Тіпті ол құрбандық үстеліне әлем чемпионы ретінде баруды армандағанын жасырмаған. Алайда Португалия құрамасы турнирді өзі күткеннен ертерек аяқтады.
Ұлттық құрама жарыстан шыққаннан кейін Роналду мен Джорджина көптен күткен салтанатқа дайындыққа толық кірісті. Жуырда папараццилер жұпты Майорка жағалауында сәнді яхтада демалып жүрген сәтте түсіріп алды. Көпшіліктің назарын Джорджинаның шамамен 35 караттық ірі сопақ гауһар таспен көмкерілген неке жүзігі аударды. Зергерлік сарапшылардың бағалауынша, оның құны 4,5-5,4 миллион АҚШ долларына дейін жетуі мүмкін.
