Ресми: Қазақстан беделді футбол матчын қабылдайды
УЕФА Атқарушы комитеті 2028 жылғы УЕФА Суперкубогы үшін матч өтетін орын ретінде Астанадағы «Астана-Арена» стадионын таңдады, деп хабарлайды Sports24.kz.
Осылайша, 2028 жылдың тамызында қазақстандық жанкүйерлер Қазақстан астанасында Чемпиондар лигасының жеңімпазы мен Еуропа лигасының жеңімпазы арасындағы матчты тамашалай алады. Сондай-ақ бұл ойын УЕФА қамқорлығымен өтетін жүлде үшін матчтардың ішіндегі ең шығыстағы кездесу болады.
Бұған дейін бұл мәртебе 2019 жылы Лондонның «Челси» мен «Арсенал» командалары арасындағы Еуропа лигасының финалын қабылдаған Бакуге тиесілі еді.
- Сондай-ақ оқыңыз: Қазақстанның Ұлттар лигасындағы төрт матчқа арналған өтінімі белгілі болды: Сатпаев кірді ме?
Астана УЕФА Суперкубогы үшін матчты қабылдайтын қала ретінде таңдалғанымен қатар, осы кездесуге қатысушылар анықталатын стадиондар да белгілі болды. 2028 жылғы Чемпиондар лигасының финалын Мюнхендегі «Альянц-Арена» қабылдайды, ал сол жылғы Еуропа лигасының шешуші матчы Бухарестегі Ұлттық стадионда өтеді.
2009 жылы салынған «Астана-Арена» үшін бұл тарихтағы ең беделді матч болады. Бұған дейін аренада елордалық «Астананың» қатысуымен Чемпиондар лигасының топтық кезеңіндегі ойындар, сондай-ақ Қазақстан ұлттық құрамасының матчтары өткен.
Еске салайық, 1998 жылдан 2012 жылға дейін УЕФА Суперкубогы бір ғана стадионда — Монакодағы «Луи II» аренасында өткізілді, ал 2013 жылдан бастап УЕФА оны Еуропаның әртүрлі стадиондарында өткізуді анықтайды. Қазақстан осындай матчты қабылдайтын 16-шы ел болады.
