Қостанайда «Тобыл» футболшысына пышақпен шабуыл жасалды: полиция жанжалды тоқтатты
Қостанайда «Тобылдың» француз қорғаушысы Папе-Альюн Ндиайенің қатысуымен жанжал болды. Қазақстандық БАҚ-тың хабарлауынша, футболшыға суық қарумен қоқан-лоқы көрсетілген, деп хабарлайды Sports24.kz.
Оқиға 1 қарашада Қайырбеков көшесіндегі тұрғын үйдің кіреберісінде болған. Алдын ала ақпарат бойынша, легионер Қазақстаннан кетіп, отанына қайтпақ болған. Алайда жалға алған пәтерінің маңында жанжалға тап болған.
Ауызша сөзталас кезінде футболшының қарсыластары оған пышақпен қоқан-лоқы көрсеткені хабарланды. Жағдайдың қауіпті болғанына қарамастан, Ндиайе дене жарақатын алмаған.
«Тобылдың» баспасөз қызметі оқиғаның болғанын растады. Клуб өкілдері жанжалдың тұрмыстық сипатта болғанын және көршілер арасында туындағанын атап өтті.
Клуб өкілдерінің мәлімдеуінше, тараптар келіспеушілікті бейбіт жолмен реттеп, бір-біріне шағымы жоқ екенін айтқан. Футболшы мен оның отбасы мүшелері аман-есен.
Ндиайенің өзі де болған жағдайға әлеуметтік желіде түсініктеме берді. Француз қорғаушы жанжалға қатысушылардың қолында суық қару болғанына қарамастан, зардап шекпегенін айтып, Қостанай полиция қызметкерлеріне араласқаны үшін алғыс білдірді.
Қостанай облысының полиция департаменті оқиғаның тіркелгенін растады. Жанжал бастаған адамға ұсақ бұзақылық фактісі бойынша әкімшілік іс қозғалды. Материалдар сотқа жолданды.
Еске салайық, 28 жастағы Папе-Альюн Ндиайе «Тобыл» сапында 2024 жылдың ақпан айынан бері өнер көрсетіп келеді. Қостанайлық клуб құрамында қорғаушы Қазақстан Кубогы мен Суперкубогының иегері атанды.
