Қош бол, Сан-Сиро? «Милан» мен «Интер» жаңа аренаны таныстырды
«Милан» мен «Интер» болашақтағы ортақ үй стадионының жобасын таныстырды. Жаңа арена «Generali Stadium» деп аталады. Бұл миландық алпауыттар үшін жаңа дәуірдің басталғанын білдіреді, деп хабарлайды Sports24.kz.
La Gazzetta dello Sport мәліметінше, атау 29 қазанда Миландағы Сфорца қамалында өткен таныстырылым кезінде жарияланды. Жаңа стадион 71 500 көрерменге есептеліп, жанкүйерлерді ойынға жақындататын екі ярусты, тостаған тәрізді сопақ конструкцияға ие болады.
Ең әсерлі элементтердің бірі қақпалардың артындағы трибуналар болмақ. Стадионның бұл секторлары Дортмундтың «Боруссиясының» әйгілі «Сары қабырғасынан» шабыт алып, 37 градусқа теңдессіз көлбеулікпен салынады. Қатты еңіс жанкүйерлерге алаңды тамаша көруге мүмкіндік бере отырып, үрейлі атмосфера қалыптастыруы тиіс.
Архитектуралық жобаны Foster + Partners және MANICA компаниялары әзірлеп жатыр. Стадионның өзінен бөлек, оған іргелес аумақта коммерциялық нысандар, мейрамханалар мен ойын-сауық орындары бой көтереді. Осылайша тарихи Сан-Сиро ауданы заманауи демалыс орнына айналады.
Жаңа стадион 2031/32 маусымына қарай ашылады деп күтілуде, ал құрылысты 2027 жылы бастау жоспарланған. «Милан» мен «Интер» аренаны Еуро-2032 турниріне дейін аяқтауды да көздеп отыр. Ал бұл уақытта аңызға айналған «Джузеппе Меацца» стадионы ішінара сүріліп жатыр. Осылайша футбол тарихының эмоцияға толы бір дәуірі мәресіне жақындауда.
