Рыбакина ғана емес: қазақстандық теннисші сенсация жасап, тарихи жетістікке жетті
Қазақстандық теннисші Жібек Құламбаева карьерасында алғаш рет жұптық разрядтағы WTA әлемдік рейтингінің топ-100 тізіміне енді. Бұл айтулы жетістікке Қытайдың Гуанчжоу қаласында өткен WTA 250 санатындағы турнирдегі сенсациялық жеңістің арқасында қол жеткізілді деп хабарлайды Sports24.kz.
Қазақстанның 26 жастағы өкілі нидерландтық Изабель Хаверлагпен жұп құрып, турнирдің басты фавориттерінің бірін жеңіп, жарыстың жартылай финалына жолдама алды.
Ширек финалда қазақстандық-нидерландтық жұпқа турнирде бірінші нөмірмен сынға түскен ресейлік Мария Козырева мен британдық Майя Ламсден қарсы тұрды.
Кездесу 1 сағат 23 минутқа созылып, Құламбаева мен Хаверлагтың 3:6, 6:3, 10:8 есебімен жеңісімен аяқталды.
Алғашқы сетте жеңілген қазақстандық теннисші мен оның серіктесі матч барысын өзгерте алды. Жартылай финал жолдамасының тағдыры чемпиондық тай-брейкте шешіліп, онда олар қарсыластарынан басым түсті.
Матч барысында жеңімпаздар екі эйс жасап, тоғыз брейк-пойнттың үшеуін пайдаланды.
Қазақстандық теннисшінің тарихи жетістігі
Жартылай финалға шығу Жібек Құламбаеваға жаңа жеке рекорд орнатуға мүмкіндік берді.
Нақты уақыт режиміндегі жаңартылған WTA рейтингіне сәйкес, қазақстандық теннисші жұптық разрядта 95-орынға көтеріліп, карьерасында алғаш рет әлемнің үздік жүз теннисшісінің қатарына енді.
Ал турнир басталғанға дейін жарияланған ресми рейтингте Құламбаева 102-орында тұрған еді.
Енді Қазақстан өкілі Хаверлагпен бірге Гуанчжоудағы жарыстың финалына шығу үшін күресін жалғастырады.
Турнирдің жартылай финалдық кездесулері 30 қазанға жоспарланған.
