«Ордабасы» ҚПЛ-дегі ең қымбат футболшыны қатарына қосты
«Ордабасының» жаңадан қосылған ойыншысы Алексей Гуцуляк Қазақстан Премьер-лигасындағы ең қымбат футболшы атанды, деп хабарлайды Sports24.kz.
Transfermarkt мамандандырылған порталының мәліметінше, Украина құрамасының 28 жастағы ойыншысының нарықтық құны 3 миллион еуроны құрайды. Осы көрсеткішпен Гуцуляк ҚПЛ-дегі ең қымбат футболшылар рейтингінде бірінші орынға үміткер.
Бұған дейін тізімнің көш басында құны 3,5 миллион еуроға дейін жеткен «Қайрат» шабуылшысы Дастан Сәтпаев болған. 2026 жылдың жазында қазақстандық футболшы отандық чемпионаттан кетіп, Англияның «Челси» клубына ауысты.
Айта кетерлігі, «Ордабасы» украиналық вингерді еркін агент ретінде қатарына қосты. Гуцуляк келісімшарты аяқталған соң житомирлік «Полесьеден» кетті, сондықтан Шымкент клубына трансферлік өтемақы төлеудің қажеті болмады.
Украиналық ойыншы ұлттық құрама сапында өнер көрсеткен және өз елінің көзге түскен шабуылшыларының бірі саналады. Оның негізгі орны — шабуылдың оң қапталы.
11 қарашада «Ордабасы» әлеуметтік желілерде жаңа ойыншысын ресми түрде таныстырды. Клубтың баспасөз қызметіне берген алғашқы сұхбатында Гуцуляк Шымкентте жылы қарсы алғанын айтып, командамен бірге Чемпиондар лигасында өнер көрсетуге ниетті екенін жеткізді.
