Месси Роналдудың үйлену тойына шақырту алды
Португалия құрамасының шабуылшысы Криштиану Роналду жеке өміріндегі ең маңызды күндердің біріне қызу дайындалып жатыр. Журналист Эсебонья Луистің мәліметінше, футболшы мен Джорджина Родригестің үйлену тойына Лионель Месси мен Неймар да шақырту алған, деп хабарлайды Sports24.kz.
Бұған дейін салтанатты шараға UFC-дің бұрынғы чемпионы Хабиб Нурмагомедовтің де қатысатыны айтылған еді. Ресейлік спортшы Роналдумен достық қарым-қатынаста екенін бірнеше рет мәлімдеген.
The Sun басылымының хабарлауынша, үйлену тойы 8 тамызда Роналдудың туған жері – Мадейра аралында өтеді. Ақпаратқа сәйкес, неке қию рәсімі Фуншал кафедралды соборында ұйымдастырылып, кейін қонақтар бес жұлдызды қонақүйдегі мерекелік кешке барады.
Сондай-ақ дереккөздің айтуынша, қонақүй әкімшілігі келушілерге той өтетін күндері бірнеше қабат пен қоғамдық аймақтардың уақытша жабылатынын алдын ала ескерткен.
Роналду мен Джорджинаның махаббат хикаясы 2016 жылы басталды. Бүгінде жұп бес баланы тәрбиелеп отыр, олардың екеуі Джорджинадан дүниеге келген.
Еске салайық, бұған дейін шетелдік БАҚ Роналду мен Джорджинаның үйлену тойы 8 тамызда Мадейрада өтетінін хабарлаған болатын.
