Мбаппе Эстер Экспоситоға қашан үйленетінін айтты
Килиан Мбаппе жеке өміріне байланысты тағы да көпшіліктің назарына ілікті. Мадридтік «Реалдың» шабуылшысын мейрамханалардың бірінің маңында испаниялық актриса Эстер Экспоситомен бірге байқаған. Осы сәтті пайдаланған журналист футболшыдан үйлену жоспары бар-жоғын сұрап көрді, деп хабарлайды Sports24.kz.
Алдымен тілші Криштиану Роналду мен Джорджина Родригестің үйлену тойы туралы сөз қозғады. Мбаппе олар үшін ең бастысы бақытты болу екенін айтты. Артынша журналист француз футболшысынан келесі болып шаңырақ көтеретін өзі ме деп тікелей сұрады.
Мбаппе бұл сұраққа жауап берместен көлігіне қарай жүре берді. Журналист мұнымен тоқтамай, Эстермен арақатынасы туралы сұрап, екеуінің бақытты екенін және оларды құттықтауға бола ма деген сауал қойды. Алайда футболшы жеке өмірінің егжей-тегжейіне тоқталмай, тек қайырлы түн тілеп, көлігімен кетіп қалды.
Бұл сәт әлеуметтік желілерде жылдам тарап, Мбаппе мен Экспоситоның ықтимал қарым-қатынасы төңірегіндегі әңгімені қайта қыздырды. Дегенмен екеуі де осы уақытқа дейін араларындағы байланысты ресми түрде жариялаған жоқ.
Футболшы мен актрисаның жақын қарым-қатынаста екені туралы сыбыс 2026 жылдың көктемінде тарай бастады. БАҚ олардың бірге жиі уақыт өткізе бастағанын жазды. Сондай-ақ жанкүйерлердің назарын Мбаппенің Экспоситоның әлеуметтік желідегі жазбаларына қалдырған пікірлері де аударған.
Эстер Экспосито Мадридте дүниеге келген. Ол Netflix платформасындағы «Элита» сериалында Карла Росон Калеруэга рөлін сомдағаннан кейін кеңінен танылды. Қазір Экспосито өз буынындағы ең танымал испаниялық актрисалардың бірі саналады.
Жұптың бірге түскен жаңа кадрлары пайда болғанымен, Мбаппе қарым-қатынасының мәртебесі мен ықтимал үйлену тойы туралы ашып айтпады. Сондықтан екеуінің болашағына қатысты сауал әзірге жауапсыз қалып отыр.
