«Матч нәтижесіне ықпал ету әрекеттері»: ҚФФ мәлімдеме жариялады
Қазақстан футбол федерациясында жекелеген футбол клубтары өкілдерінің бәсекелестік артықшылыққа қол жеткізу мақсатында төрешілердің жұмысына заңсыз ықпал етуге әрекет жасауы мүмкін екені туралы ақпарат бар, деп хабарлайды Sports24.kz.
«ҚФФ қарамағында төрешілердің біріне заңсыз ықпал етуге әрекет жасалғаны туралы ақпарат бар. Қолда бар ақпарат пен жағдайларды қарау қорытындысы бойынша ҚФФ бұл төрешіні футбол жарыстарына қатысудан мерзімсіз шеттету туралы шешім қабылдады. Қазіргі кезеңде төрешінің аты-жөні жарияланбайды», – делінген ұйым хабарламасында.
Айта кетейік, ҚФФ футбол жарыстарына қатысушыларға ықтимал қысым көрсету, материалдық сыйақы ұсыну және беруге қатысты, сондай-ақ заңсыз ықпал етудің басқа да түрлері туралы ақпараттарды жинау мен талдауды жалғастырып жатыр. Федерация спорттық нәтижелерді манипуляциялаудың кез келген әрекетіне нөлдік төзімділік қағидатын ұстанатынын атап өтті.
«Төрешілерге қысым көрсету, ақша ұсыну немесе беру, сондай-ақ матчтардың өту барысына араласудың өзге де түрлеріне, бұған қатысы болуы мүмкін тұлғалардың мәртебесі мен қандай да бір ұйымға тиесілігіне қарамастан, жол берілмейді. Келіп түскен барлық ақпарат мұқият тексеріледі. Тиісті фактілер расталған жағдайда, ҚФФ регламенттерде және Қазақстан Республикасының заңнамасында көзделген шараларды қабылдайды әрі өз құзыреті шегінде құзырлы мемлекеттік органдармен өзара іс-қимыл жасайды», – деп қосты федерация.
ҚФФ сондай-ақ спорттық жарыстарды манипуляциялаудың ең ауыр түрлері үшін жауапкершілік мәселесінде Қазақстан заңнамасын жетілдіру бойынша жұмысты бастамақ. Атап айтқанда, мұндай заң бұзушылықтар үшін қылмыстық-құқықтық салдарды күшейту мәселесі қаралады.
«Жарыстардың адалдығы, төрешілердің тәуелсіздігі және жанкүйерлердің сенімі – Қазақстан футболының негізгі қағидаттары. ҚФФ бұл қағидаттарды дәйекті түрде қорғайды және футбол алаңынан тыс жерде спорттық нәтижеге ықпал етуге бағытталған кез келген әрекеттің жолын кеседі», – деп қорытындылады федерация.
