Мареска ПСЖ-мен Чемпиондар лигасындағы тартыс алдында пікір білдірді
15 қазанға қараған түні УЕФА Чемпиондар лигасы аясында «Манчестер Сити» мен ПСЖ арасында маңызды кездесу өтеді.
«Этихадта» Еуропаның үздік командасына қарсы өтетін айтулы үй матчінің алдында «Манчестер Ситидің» бас бапкері Энцо Мареска ауқымды баспасөз конференциясын өткізді, деп хабарлайды Sports24.kz.
– Жексенбі күні «Энфилдтегі» матчтан кейін сіздің ойыншылармен бірге жанкүйерлерге барған сәттеріңізді көрдік. Ертең сіздер жанкүйерлермен тағы да кездесесіздер, бірақ бұл жолы «Этихадта». Мұны қаншалықты асыға күтіп жүрсіз?
– Асыға күтіп жүрмін. Өзіңіз айтқандай, «Ливерпульмен» ойыннан кейін эмоция өте керемет болды, бірақ ол матч артта қалды. Қазір біз ертеңгі кешке назар аударып отырмыз және ойыннан кейін жанкүйерлерімізбен қуанышты сәттерді тағы да бөлісе аламыз деп үміттенемін.
– Пеп Гвардиоланың ертең матчқа келетінін білеміз. Онымен сөйлесесіз бе және оның сіз бен ойыншылар үшін қатысуы нені білдіреді?
– Бірнеше күн бұрын айтқанымдай, Пеппен соңғы рет «Юнайтедпен» болған ойыннан кейін сөйлестім. Содан бері сөйлескен жоқпыз. Егер ол келсе, бұл әсіресе өзі үшін керемет болады. Өйткені бұл клуб оның 10 жыл бойы үйі болды және оның осында атқарған барлық еңбегінің арқасында әлі де солай болып қала береді. Меніңше, бұл – барлығы үшін қуанышты оқиға.
– Энцо, ойыншылар алаңға шығар алдында айтатын сөздеріңізді қаншалықты мұқият ойластырасыз? Сіз нақты тапсырма беретін бапкерлердің бірісіз. Демалыс күндері «Энфилдтің» орасан қысымына төтеп беруге тура келді, ал өз жанкүйерлеріңіздің алдында ойнау – мүлде бөлек нәрсе. Ертеңгі матч алдында ойыншыларға қандай тапсырма бересіз?
– Тапсырма өте қарапайым. Біз мінсіз матч өткізуіміз керек, өйткені дәл қазір Еуропаның үздік командасына қарсы ойнаймыз. Олар соңғы екі Чемпиондар лигасын жеңіп алды, бұл олардың деңгейін көрсетеді. Бізге мінсіз ойын қажет. Сонымен бірге өз мүмкіндігімізді барынша көрсетсек, оларды жеңіп, соңғы ысқырықтан кейін қуана аламыз деп сенемін.
– Энцо, осы маусымда «Ситиді» Чемпиондар лигасының фавориттерінің бірі деп санайсыз ба? Сіздің ойыңызша, ПСЖ бір деңгей жоғары ма, әлде командаңыз оларға еш жол бермей ме?
– Біздің мықты команда екенімізге сенімдімін. Бұған еш күмән жоқ. Қазір қарсыласпен салыстырғанда қай деңгейде тұрғанымызды, шынымды айтсам, білмеймін. Олардың қаншалықты мықты екенін түсінемін. Өйткені олар соңғы екі Чемпиондар лигасын жеңіп алды. Бірақ біз оларға қаншалықты жақынбыз, оны білмеймін. Дегенмен бір нәрсеге анық сенімдімін. Біздің тамаша командамыз бар.
«Манчестер Сити» мен ПСЖ арасындағы матч 14 қазаннан 15 қазанға қараған түні өтеді. Астана уақытымен басталуы 00:00-ге жоспарланған.
