«Ливерпуль» түлегі «Ақтөбеге» ауысты. Ол туралы не белгілі?
«Ақтөбе» ағылшын шабуылшы жартылай қорғаушысы Олувасейи Бабаджиде Оджоның келісімшартқа отырғанын ресми түрде жариялады, деп хабарлайды Sports24.kz.
29 жастағы вингер – «Ливерпуль» академиясының түлегі. Ол мерсисайдтықтар сапында 13 матч өткізіп, бір гол соққан.
Кәсіби деңгейде жартылай қорғаушы Англия чемпионатында «Уиган», «Вулверхэмптон», «Фулхэм», «Кардифф Сити» және «Миллуол» клубтарында өнер көрсетті. Сонымен бірге, футболшы Францияның «Реймс», Шотландияның «Рейнджерс», Бельгияның «Кортрейк» және Словенияның «Марибор» клубтарының жейдесін киген. Соңғы командадан ол жазда еркін агент ретінде кетті.
Ол өз активінде АПЛ-да 8 матч, сондай-ақ Англия Чемпионшипінде 145 ойын (12 гол) бар екенін мақтанышпен айта алады. Бұдан бөлек, Шейи Оджо Англияның жасөспірімдер және жастар құрамаларында ойнап, Англия U20 сапында әлем чемпионы атанған. Transfermarkt порталы тәжірибелі вингерді 600 мың еуроға бағалайды.
Айта кетейік, бұған дейін Игорь Черевченко «Ақтөбе» бас бапкері ретіндегі алғашқы матчынан кейінгі қорытындысын айтты.
