Ислам Чесноков «Крылья Советов» клубына ауысты
Қазақстан құрамасының жартылай қорғаушысы Ислам Чесноков Самараның «Крылья Советов» клубының ойыншысы атанды. Ресейлік команда қостанайлық «Тобылмен» 26 жастағы футболшыны кейіннен сатып алу құқығымен жалға алу жөнінде келісімге келді, деп хабарлайды Sports24.kz.
Самаралық клуб жаңа ойыншысын ерекше тәсілмен таныстырды. Чесноковтың бейнесі «Виктория» галереясындағы картина түрінде көрсетілді. «Крылья Советов» таныстырылымды: «Картинаның орны – «Виктория» галереясында, ал суретшінің орны – алаңда», – деген сөздермен толықтырды.
Чесноков үшін бұл Қазақстаннан тыс жерде өнер көрсетудегі алғашқы тәжірибе емес. Өскеменнің «Алтай» академиясының түлегі 2021 жылы Беларуське аттанып, «Белшина» сапында ойнады. Екі жылдан кейін елге оралып, «Тобыл» қатарына қосылды.
Футболшы үшін 2024 жылғы маусым ерекше сәтті өтті. Оның қорытындысы бойынша Чесноков Қазақстан Премьер-лигасының үздік ойыншысы әрі үздік сұрмергені атанды. Қостанайлық командамен бірге ол Қазақстан Кубогын екі рет жеңіп, ел Суперкубогын да иеленді.
2026 жылдың қаңтарында «Тобылмен» келісімшарты аяқталғаннан кейін Чесноков Еуропада бағын сынауға шешім қабылдады. Еркін агент ретінде ол шотландиялық «Харт оф Мидлотианмен» келісімге келді. Эдинбург клубының сапында қазақстандық футболшы барлық турнирде 11 матч өткізіп, бір гол соқты. Сондай-ақ командасымен бірге Шотландия чемпионатының күміс жүлдегері атанды.
Шотландиядағы кезеңі шамамен жарты жылға созылды. Маусым айында Чесноков қайтадан «Тобыл» сапына оралды. Енді Қостанайдан Ресей Премьер-лигасына аттанып отыр. Жалпы «Тобыл» жейдесінде жартылай қорғаушы 101 матч өткізіп, 29 гол соқты және 17 нәтижелі пас берді.
«Крылья Советов» басшылығы қазақстандық футболшыны ұзақ уақыт бойы бақылап жүргенін мәлімдеді. Самара клубының бас директоры Тархан Джабраилов Чесноковтың жеке шеберлігі мен жоғары орындар үшін күрестегі тәжірибесін атап өтті.
«Ислам біздің назарымызда бұрыннан болды, оны ұзақ уақыт бақыладық. Ол – жеке шеберлігі жоғары, білікті футболшы және шабуылымызды күшейте алады. Исламның жоғары орындар үшін күрескен және еурокубоктарда ойнаған тәжірибесі бар. Қазір оны клуб үшін тиімді шарттармен шақыруға мүмкіндік туды. Сондықтан сатып алу құқығымен жалға алдық. Чесноков «Крылья Советов» үшін сапалы трансфер болады деп сенемін», – деді Джабраилов.
Чесноков Қазақстан ұлттық құрамасында 2023 жылдан бері өнер көрсетіп келеді. Ол бас команда сапындағы алғашқы кездесуін Еуропа чемпионатының іріктеу кезеңінде өткізді. Қазіргі таңда жартылай қорғаушы ұлттық құрама жейдесінде 24 матчқа қатысып, екі гол соққан.
