Хусанов Азияның ең қымбат футболшысы атанды
Өзбекстан құрамасы мен Англияның «Манчестер Сити» клубының қорғаушысы Абдукодир Хусанов Азиядағы ең қымбат футболшы атанды, деп хабарлайды Sports24.kz тілшісі.
Transfermarkt порталының соңғы жаңартуынан кейін өзбекстандық қорғаушының нарықтық құны бірден 15 миллион еуроға өсіп, 50 миллион еуроға жетті.
Осының арқасында Хусанов жапониялық Каишу Сано мен Такефуса Кубодан озып, Азия футболшылары арасында бірінші орынға шықты.
Хусанов АПЛ-дегі ең қымбаттаған ойыншылар қатарына енді
Сонымен қатар «Манчестер Сити» қорғаушысы маусым қорытындысы бойынша Англия Премьер-лигасында бағасы ең көп өскен футболшылар тізімінде сегізінші орын алды.
Transfermarkt бұл жолы АПЛ-дегі 524 футболшының құнын қайта қарады.
Жалпы лига құны 209 миллион еуроға төмендегеніне қарамастан, Англия чемпионаты әлемдегі ең қымбат футбол турнирі мәртебесін сақтап қалды. Қазіргі таңда лига ойыншыларының жалпы құны 12,37 миллиард еуроны құрайды.
Хусанов Англияда сәтті маусым өткізді
Өткен маусымда 22 жастағы қорғаушы «Манчестер Сити» сапында барлық турнирде 37 матч өткізді.
Нәтижелі әрекеттерімен көзге түспесе де, өзбекстандық футболшы командасымен бірге Англия Кубогы мен Англия лигасы кубогын жеңіп алды.
Хусанов әлем чемпионатында ойнайды
Айта кетейік, Абдукодир Хусанов Өзбекстан құрамасымен бірге 2026 жылғы әлем чемпионатына қатысады.
Топтық кезеңде Өзбекстан құрамасының қарсыластары Португалия, Колумбия және Конго Демократиялық Республикасы болады.
