Дастан Сәтпаевты «Челсидің» аңызымен салыстырды
18 жастағы қазақстандық шабуылшы Дастан Сәтпаевты лондондық «Челси» мен Бельгия құрамасының аты аңызға айналған қанат ойыншысы Эден Азармен салыстырды, деп хабарлайды Sports24.kz.
Біздің тілшіміз «Бернли» командасы «Вулверхэмптонға» қарсы ойнаған соңғы матчқа барды. «Бордолылар» сәтсіз өнер көрсетіп, өз алаңындағы кезекті жеңілісіне ұшырады. Алаң иелері есепті бірінші болып ашқанына қарамастан, 1:2 есебімен ұтылды.
Алайда стадиондағы жанкүйерлер қазақстандық Дастан Сәтпаевтың осы маусымдағы ойынына оң бағасын беріп отыр.
«Дастан осы маусымдағы үздік футболшыларымыздың бірі болды. Иә, ол жас ойыншы, бірақ ойынды өз қолына алудан және шабуылды шиеленістіруден қорықпайды. Мен Дастанның ойынын кезінде «Челси» сапында өнер көрсеткен Эден Азармен салыстырар едім. Ол да бойы аса биік емес, бірақ қанат бойымен көп жүгіретін, орталыққа қауіпті ауысулар жасап, айып алаңы сыртынан соққы жасайтын», - деді жанкүйерлердің бірі.
Ал тағы бір «Бернли» жанкүйерінің пікірінше, бірнеше жылдан кейін қазақстандық футболшы жаңа деңгейде өнер көрсетеді.
«Дастанның өзіндік стилі бар, ол - бірегей, талантты әрі жылдам ойыншы. 2-3 жылдан кейін оның керемет футболшы атанатынына таңғалмаймын», - деді жанкүйер.
Қазақстан құрамасының футболшысын команда бас бапкері де жоғары бағалады. Оның айтуынша, Сәтпаевтың таланты зор.
«Дастан - жас ойыншы, ол «Челсиге» тиесілі. Өте талантты, гол соғатын мүмкіндіктері көп, өте қарқынды әрі жігерлі ойыншы, сондықтан ол біз үшін үлкен актив. Өкінішке қарай, ол жарақат алып қалды, сол себепті оның жүктемесін бақылауға тура келді», - деді Никки Хайен.
Еске салайық, биыл жазда Дастан Сәтпаев Алматының «Қайрат» клубынан лондондық «Челсиге» ауысты. 18 жастағы қазақстандық шабуылшы қазіргі маусымды «Бернли» сапында жалға алу негізінде өткізіп жатыр. Ол ағылшын футболына біртіндеп бейімделіп, тәжірибе жинауда.
11 матчтан кейін «Бернлидің» еншісінде 8 ұпай бар. Никки Хайеннің командасы төмендеу аймағында орналасып, турнир кестесінің 22-сатысында келеді.
