«Чемпион боламыз деп сендім, тіпті ұтылып жатқанда да». Касабулат — «Астанаға» қарсы матч туралы
26 қазанда Алматыда «Қайрат» «Астанамен» тең ойнап, чемпион атанды. Ойыннан кейін Sports24.kz тілшісі осы кездесудің қатысушыларының бірі — алматылық команданың қорғаушысы Дамир Касабулаттың пікірін жазып алды.
— Әрине, қобалжыдық. Бірақ өзімізге сенімді болдық, себебі біз маусым бойы жақсы ойын көрсеттік. Оның бәрін алаңда дәлелдеу керек болды, – деді Касабулат.
— Матч барысында ұтылып жатқандарыңызда да чемпион болатынымызға сенімді болдыңыздар ма?
— Иә, әрине. Бір гол соқсақ, бәрі түсінікті еді — біз чемпионбыз.
— Есеп 1:1 болған соң, нәтижені ұстап қалуға тапсырма болды ма?
— Жоқ, ондай нақты тапсырма болған жоқ. Ойынға байланысты өзіміз шештік. Басты мақсат — екінші, үшінші гол соғу. Жеңіске жету керек болды, себебі трибунада жанкүйер көп еді, біз міндетті түрде чемпион болуымыз қажет еді.
— Соңғы айларда өміріңізде көп оқиға болды: Қазақстан құрамасына шақырту, командамен бірге Чемпиондар лигасына шығу, үйлену тойы, енді чемпиондық. Мұның бәрі түс секілді сезіле ме?
— Бәлкім, солай шығар. Бірақ мен күнде еңбек етемін, Алла соның жемісін беріп жатыр деп ойлаймын.
— Келесі жылы осы жетістіктерді қайтадан қайталай аласыздар деп ойлайсыз ба?
— Келесі жыл... Ойланамыз. Әзірге белгісіз.
Сондай-ақ, «Қайраттың» ойыншысы Гиорги Зария алматылық команданың қатарынан екінші мәрте чемпион атануы туралы пікір білдіріп, футболшылар тарихта алтын әріппен жазылды деп атап өтті. Ал сары-қаралардың қорғаушысы Александр Мрынский «Астанаға» қарсы матчтың соңында команданың сәл жолы болғанын, бірақ чемпиондық әділ екенін мойындады.
ҚПЛ-дың соңғы турында «Қайрат» басты бәсекелесі «Астанамен» тең ойнап (1:1), Қазақстанның 2025 жылғы чемпионы атанды. Толығырақ — мұнда.
