«Бернлидің» жаңа жаттықтырушысы Челестини клубқа кімдерді әкелетіні белгілі болды
Англияның «Бернли» клубына бас бапкер болып тағайындалған швейцариялық маман Фабио Челестини жаттықтырушылар штабын кем дегенде екі маманмен толықтырады, деп хабарлайды Sports24.kz.
Бұл туралы Burnley Express хабарлады.
50 жастағы жаттықтырушы команданы Чемпионшиптің төмен түсу аймағынан шығаруы тиіс. Ол үшін алғашқы сынақ сенбі күні өтетін «Портсмутқа» қарсы матч болмақ.
Челестини 106 күн жұмыс істегеннен кейін қызметінен босатылған Никки Хайеннің орнын басты. Бельгиялық маманның жетекшілігімен «Бернли» лигадағы 12 матчта небәрі бір жеңіске жетіп, төмен түсу аймағына түсті.
Дереккөздің мәліметінше, жаңа бапкер өзімен бірге кем дегенде екі жаттықтырушыны алып келеді. Олар Хайенмен бірге клубтан кеткен бельгиялық мамандар Йохан ван Румст пен Маттиас Бернарттың орнын басады деп болжануда.
Сонымен қатар, Майк Джексон, Хенрик Йенсен, Джек Корк және қақпашылар жаттықтырушысы Керстен Кульдің «Бернлидегі» жұмысын жалғастыратыны әзірге белгісіз.
Челестинимен бірге ағылшын клубына қосылмайтын мамандардың бірі Жозе Блеса болады. Ол швейцариялық маманмен «Базель» мен мәскеулік ЦСКА-да бірге жұмыс істеген. Блеса әлеуметтік желілерде жаттықтырушымен қоштасқанын растап, бірлескен жұмысы үшін алғыс білдірді және мансабының жаңа кезеңінде оған қолдау көрсетті.
«Бүгін біздің кәсіби жолдарымыз екіге айырылды, алайда бірге бастан өткергеніміз бен қол жеткізген жетістіктеріміздің барлығы менімен мәңгі бірге қалады», - деп жазды маман.
Челестинимен бірге Ресейде Манель Эспосито, Хави Нойя, Габриэле Баттаглини және Паоло Фаваретто да жұмыс істеген. Алайда олардың «Бернлиге» ықтимал ауысуы туралы ақпарат әзірге расталған жоқ.
