«Бернлидің» мәселелері Англияның жаңа футбол реттеушісінің назарын аударды
Ағылшындық «Бернлидің» футбол алаңынан тыс мәселелері Англияның тәуелсіз футбол реттеушісінің (IFR) назарын аударды. Ұйым клубтың бас компаниясы қаржылық есептілігіне байланысты ескерту алғаннан кейін «Бернлиден» түсініктеме сұратты, деп хабарлайды Sports24.kz.
Burnley Express басылымының мәліметінше, әңгіме ALK Capital инвестициялық тобына тиесілі Velocity Capital (UK) Holdings компаниясы туралы болып отыр. Компания екі жылға жуық уақыт бойы қаржылық есептілігін ұсынбаған, сондықтан оған Ұлыбританияның ресми тізілімінен шығарылу қаупі төніп тұр.
Егер Companies House компанияны тізілімнен шығарса, ол таратылып, заңды тұлға ретінде өмір сүруін тоқтатады.
ALK Capital өкілдері Companies House-пен байланысқа шыққанын және құжаттарға қатысты жағдайды мүмкіндігінше тезірек түзетуге ниетті екенін мәлімдеді.
Компания бұған дейін де осындай ескерту алған — 2025 жылғы ақпанда. Ол кезде мәселе бір айдың ішінде шешілген. Velocity Capital 2023 жылғы наурызда тіркелген, ал алғашқы қаржылық есептілігін 2024 жылғы 24 желтоқсанға дейін ұсынуы тиіс болған. Алайда компания құрылған сәттен бері бірде-бір есеп тапсырмаған.
Бұған дейін осындай ескертулердің бірін ALK Capital компаниясының өзі де алған — 2022 жылғы желтоқсанда және 2024 жылғы желтоқсанда. Екі жағдайда да мәселе шешімін тапқан.
2025 жылғы шілдеде құрылған Англияның тәуелсіз футбол реттеушісі «Бернлиден» қосымша ақпарат сұратқанын растады. Ұйым бұл жағдайды Англия футбол лигасымен (EFL) де талқылап жатыр.
«IFR «Бернлидің» бас компаниясы — Velocity Capital (UK) Holdings-ке қатысты хабарламадан хабардар. Біз клубтан қосымша ақпарат сұраттық және бұл мәселені EFL-мен белсенді түрде талқылап жатырмыз. Қазіргі таңда қосымша түсініктеме бере алмаймыз», — деді реттеуші өкілі.
