Барлық уақыттағы ең көп титул жеңіп алған 10 футболшы

Көптеген мақала футболға, яғни планетадағы ең танымал ойынға арналған. Бүгін біз миллиондар ойынының ең көп титул жеңіп алған футболшылары туралы сөз қозғаймыз.

Бұл тізімде Лионель Месси өзінің басты қарсыласы Криштиану Роналдудан айтарлықтай алда. Толығырақ білгіңіз келе ме? Sports24.kz ұсынған барлық уақыттағы ең көп жүлде жеңіп алған доп шеберлерінің ондығына арналған материалды оқыңыз.

1. Лионель Месси (47 трофей)

Заманауи футболдың ең ұлы ойыншысы бүкіл әлемдегі миллиондаған жанкүйердің жүрегінен орын тапты. Жеке марапаттарды есептемегенде, «Алтын допты» сегіз рет иеленген Месси клубтық деңгейде және Аргентина құрамасымен бірге 47 трофей жеңіп алды. Бұл – абсолютті рекорд.

Месси 35 трофейді «Барселонамен», 3 жүлдені ПСЖ құрамында, 2 трофейді «Интер Майамимен» жеңіп алды. Аргентиналық футболшы халықаралық деңгейде 7 жүлдеге қол жеткізді. Оның ішінде 2022 жылғы әлем чемпионаты да бар. Бұл әлі шегі емес. 39 жастағы Месси мансабын жалғастырып жатқандықтан, өзінің таңғажайып коллекциясын тағы да толықтыруы әбден мүмкін.

2. Маркиньос (43 трофей)

32 жастағы бразилиялық қорғаушының мансабында қазіргі таңда 43 трофей бар. Жақында Маркиньос өзінің жүлделер қорын УЕФА Суперкубогымен толықтырды.

Ол титулдарының басым бөлігін 2013 жылдан бері өнер көрсетіп келе жатқан ПСЖ құрамында жеңіп алды. Француз клубымен бірге Лига 1-де, Франция кубогы мен Суперкубогында топ жарды, сондай-ақ Чемпиондар лигасы мен УЕФА Суперкубогын жеңіп алды. Бұдан бөлек, Маркиньос «Коринтианс» сапында Либертадорес кубогын және Бразилия құрамасымен 2016 жылғы Олимпиада мен 2019 жылғы Америка кубогын жеңіп алған.

3. Дани Алвес (42)

Даулы тұлғаға айналған бразилиялық жүлделер саны бойынша өзінің ұлттық құрамадағы әрі ПСЖ-дегі бұрынғы серіктесінен сәл ғана қалып қойды. Алвестің алтын дәуірі «Барселонада» өнер көрсеткен кезеңіне тұспа-тұс келді. Каталониялық клуб сапында ол елестетуге болатын барлық кубок пен титулды жеңіп алды. Сонымен қатар Алвес «Севилья», «Ювентус» және ПСЖ клубтарында да өнер көрсетті. Бразилия құрамасымен бірге Олимпиада чемпионы атанып, Америка кубогын екі рет жеңіп алды.

4. Хоссам Ашур (39)

Көптеген оқырман бұл есіммен таныс болмауы мүмкін, өйткені Хоссам өзінің жарқын мансабының барлығын Египетте өткізді.

Жалпы алғанда, ол 497 матч өткізіп, 39 ресми титул жеңіп алды. «Аль-Ахли» мен Египет футболының аңызының басты жетістіктері қатарында – Египет чемпионы атанған 13 мәрте, Египет Суперкубогының 10 жеңімпаз медалі, КАФ Чемпиондар лигасының 6 титулы, Африка Суперкубогының 5 жүлдесі, Египет кубогының 4 жеңімпаз медалі және КАФ Конфедерация кубогының 1 жүлдесі бар.

5-6. Андрес Иньеста және Серхио Бускетс (38 трофейден)

«Барселона» мен Испания құрамасының қос бірдей аңызы біздің рейтингте бір жолда тұр. Иньеста – «блауграна» академиясының түлегі. Оның негізгі мансабы Хосеп Гвардиола тұсындағы клубтың алтын дәуіріне сәйкес келді. Сол командада Иньеста басты «дирижер» әрі алаңдағы ойынды ұйымдастырушы болды. Ол дәл осындай рөлді Испания құрамасында да атқарды. Ұлттық командамен бірге екі рет Еуропа чемпионы атанып, бір рет әлем чемпионатын жеңіп алды. Оның үстіне, 2010 жылғы әлем чемпионатының жеңісті финалында Иньеста Нидерланд қақпасына шешуші гол соғып, есімін футбол тарихына алтын әріптермен жазды.

Аты аңызға айналған жартылай қорғаушы 2024 жылы 40 жасында кәсіби ойыншы ретіндегі мансабын аяқтады. Футболшының соңғы клубы БАӘ-нің «Эмирейтс» командасы болды. Қазіргі уақытта ол Дубайдың «Галф Юнайтед» клубында жаттықтырушы болып жұмыс істейді.

Бускетс те «Барса» мен «Қызыл фурия» үшін кем түспейтін аңыз тұлға. Серхио ойыншылық мансабының басым бөлігін, яғни 2008-2023 жылдар аралығын каталониялық клубқа арнады және оның сапында 700-ден астам матч өткізді. Испания құрамасында 143 ойын өткізіп, 2010 жылғы әлем чемпионы және 2012 жылғы Еуропа чемпионы атанды. Серхио 2025 жылдың соңында америкалық «Интер Майами» сапында MLS кубогын жеңіп алғаннан кейін ресми түрде ойыншылық мансабын аяқтап, қазір жаттықтырушылық жолын бастауға кірісті.

7. Криштиану Роналду (37)

Жақында «Аль-Насрмен» Сауд Арабиясы чемпионатын жеңіп алған Криштиану Роналду өзінің жарқын мансабындағы 37-ресми трофейіне қол жеткізді. Португалиялық аңыз үшін ең жемісті кезең Мадридтің «Реалында» өтті – ол жерде 16 клубтық титул жеңіп алды. «Алтын допты» бес рет иеленген футболшы «Манчестер Юнайтедпен» 10, «Ювентуспен» 5 трофейге қол жеткізді. Сонымен қатар Криштиану Португалия құрамасымен Еуропа чемпионы атанып, Ұлттар лигасын екі рет жеңіп алды.

8. Жерар Пике (36)

Заманауи футболдағы ең танымал әрі харизмасы жоғары қорғаушылардың бірі. «Барселонамен» 9 рет чемпион атануы, 7 Испания кубогын жеңіп алуы, сондай-ақ Чемпиондар лигасы мен УЕФА Суперкубогында үш реттен топ жаруы – өзі үшін сөйлейтін жетістіктер. Сондай-ақ Пике «Манчестер Юнайтедпен» бірге Чемпиондар лигасын жеңіп, Испания құрамасының 2010 жылғы әлем және 2012 жылғы Еуропа чемпионы атануына үлес қосты. Жерар 2022 жылы «блауграна» сапындағы соңғы матчын өткізіп, ойыншылық мансабын аяқтады. Пике жаттықтырушылық жолды таңдаған жоқ: ол медиалигалардың бірінің негізін қалаушы әрі спорт және ойын-сауық индустриясына белсенді инвестиция салып келеді.

9. Райан Гиггз (35)

«Манчестер Юнайтедтің» тірі аңызы әрі клубтың символына айналған Гиггз өзінің мансабында Уэльс құрамасымен бірде-бір ірі халықаралық турнирге қатыса алмады. Ол «Қызыл сойқандармен» Англия чемпионы атанған 13 маусым өткізді, ел кубогын төрт рет жеңіп алды және Чемпиондар лигасының басты жүлдесін екі мәрте төбесіне көтерді.

Гиггз өзінің бүкіл жарқын ойыншылық мансабын «Олд Траффордта» өткізді. 2014 жылы дәл осы жерде ойыншылықтан жаттықтырушылық жұмысқа ауысатынын жариялады. Алайда жаттықтырушы ретіндегі мансабы әзірге аса сәтті бола қойған жоқ. 2022 жылы Уэльс құрамасынан кеткеннен кейін Райан өзі ортақ иесі болып табылатын ағылшынның «Солфорд Сити» футбол клубында спорт директоры қызметін атқарып келеді.

10. Хави (32)

Ең көп титул жеңіп алған футболшылар рейтингін «Барселонаның» тағы бір аңызы Хави Эрнандес түйіндейді. Хави 32 трофейін өзі түлеп ұшқан «Барсаның» құрамында жеңіп алды. Оның қатарында ішкі біріншіліктер мен халықаралық жарыстардағы сан алуан титулдар бар. Испания құрамасымен бірге екі рет Еуропа чемпионы және бір рет әлем чемпионы атанып, алаң ортасындағы ең маңызды ойыншылардың бірі болды. Ойыншылық мансабын катарлық «Аль-Садд» клубында аяқтады.

Испаниялық футболшы жаттықтырушы ретінде де өзін тапты. Катардағы сәтті кезеңнен кейін оның басшылығымен «Барселона» 2024 жылы Испания чемпионы атанды. Биыл жазда Хави Нидерланд құрамасының бас бапкері болып тағайындалып, «қызғылт сары түстілерді» әлемдік және еуропалық футбол элитасына қайта оралтуға тырысады.