«Астана» сырт алаңда «Қызылжардан» жеңісті уыстан шығарып алды
«Астана» Қазақстан Премьер-лигасының 22-турында сырт алаңда «Қызылжардан» жеңісті уыстан шығарып алды, деп хабарлайды Sports24.kz.
«Астана» бұл кездесуге керемет формада (қатарынан бес жеңіс) және турнир кестесінде үшінші орында келді. Петропавлдық ұжым турнирлік кестенің ортасында орналасқанымен, фаворитке лайықты қарсылық көрсетуге бел буды.
Кездесу екі жаққа да тең дәрежеде өтті, алайда астаналықтар сәл басымырақ ойнады. Григорий Бабаян командасының территориялық басымдығы Басмановтың сағаттың аяқ шенінде соққан голымен нәтижеленді.
Қалған уақытта алаң иелері есепті теңестіру үшін жанкешті шабуылдап, ақыры қосымша уақытта Пишевичтің голымен дегеніне жетті. Осылайша, Петропавлда тартысты матч 1:1 есебімен аяқталды.
Бұл нәтижеде Бабаянның шәкірттері 39 ұпай жинап, КПЛ-дың үшінші сатысында орнықты. Ал «Қызылжар» 23 ұпаймен Премьер-лигадағы 11-орынды сақтап қалды.
КПЛ, 22-тур
«Қызылжар» – «Астана» 1:1
Голдар: Пишевич, 90+3 – Басманов, 59
