«Алтын доп» 2026: кім фаворит, ал кімнің мүмкіндігі аз?
8 қыркүйекте 2026 жылғы «Алтын доп» сыйлығына үміткерлердің есімдері белгілі болады. Номинанттар тізімі жарияланар алдында БАҚ беделді жеке жүлдеге басты үміткерлерді атады, деп хабарлайды Sports24.kz.
Sport1.de мәліметінше, биыл ерлер арасындағы «Алтын доп» үшін күрес ең болжамсыз жарыстардың біріне айналуы мүмкін. Жүлдеге басты үміткерлер қатарында Испания құрамасының капитаны Родри, Лионель Месси, Килиан Мбаппе және Харри Кейн аталады.
Ал Чемпиондар лигасында «Пари Сен-Жермен» сапында жеңіске жеткен Усман Дембеле мен Хвича Кварацхелия әзірге басты жеке жүлде үшін күресте аутсайдерлер қатарында тұр.
Ал әйелдер арасында ше?
Әйелдер арасындағы номинацияда да басты фавориттер қатарында «Барселона» өкілдері аталып отыр. Негізгі үміткерлердің арасында «Алтын допты» үш рет жеңіп алған Айтана Бонмати және осы жазда «Барселонадан» «Лондон Сити Лайонессиске» ауысқан Алексия Путельяс бар. Испаниялық футболшы бұл марапатты екі рет иеленген.
2026 жылғы «Алтын доп» марапаттау рәсімі Лондонда өтеді. Салтанатты шара 26 қазанға жоспарланған.
Жүлдені ұйымдастырушылар France Football мен УЕФА 70 жыл ішінде алғаш рет марапаттау рәсімін Парижден тыс жерде өткізуді шешті. Лондонның таңдалуы жүлденің 70 жылдығымен және «Алтын доптың» алғашқы иегері, аңызға айналған ағылшын футболшысы сэр Стэнли Мэттьюзге құрмет көрсетумен байланысты.
Еске салайық, 2025 жылы «Алтын допты» Усман Дембеле алды. Ал 2024 жылғы марапат испаниялық жартылай қорғаушы Родриге табысталды.
