«Қайраттың» көшбасшысы ота жасатты: не белгілі?
Алматының «Қайрат» клубының шабуылшысы Жоржиньо оң тізесіне жасалған операцияны сәтті өткерді, деп хабарлайды Sports24.kz.
Қазақстан чемпионының баспасөз қызметінің мәліметінше, футболшы Португалиядағы клиникада хирургиялық ем қабылдады. Алдыңғы айқас шегелі байламды қалпына келтіру операциясын доктор Луиш Мигел Силва жүргізгені айтылды. Алдағы күндері шабуылшы клуб дәрігерлерінің бақылауымен жоспарлы қалпына келу кезеңін бастайды.
Айта кетейік, Жоржиньо жарақатын Премьер-лиганың 19-турында «Ордабасыға» қарсы кездесуде (2:1) алған болатын. 28 жастағы португалиялық шабуылшы «Қайрат» сапында 2025 жылдың қаңтарынан бері өнер көрсетуде. Биылғы маусымда ол барлық турнирлерде 23 матчта 9 гол және 2 нәтижелі паспен көзге түсті.
Сонымен қатар, елдің қазіргі чемпионы ҚПЛ-де екінші орында тұр. «Ордабасыдан» төрт ұпай артта қалып отыр, бірақ бір ойыны кем.
Айта кетсек, бұған дейін суперкомпьютер Рафаэль Уразбахтин командасының УЕФА Еуропа лигасы плей-офф кезеңіндегі қарсыласын атаған болатын.
