Санжар Ташкенбай кәсіпқой рингтегі дебюті алдында маңызды мәлімдеме жасады ⇒ Sports24.KZ

Екі дүркін әлем чемпионы Санжар Ташкенбай Астанада өтетін IBA Nomad турнирі алдындағы баспасөз мәслихатында алдағы жекпе-жекте жақсы бокс көрсетуге дайын екенін айтты. Қазақстандық боксшы филиппиндік Нил Хакамосқа (7-1, 1 КО) қарсы титулдық жекпе-жек өткізеді. Кездесуде бірінші аса жеңіл салмақтағы IBF Asia чемпионының бос титулы сарапқа салынады. Жекпе-жек 10 раундқа жоспарланған, деп хабарлайды Sports24.kz.

«Бұл — кәсіпқой рингтегі алғашқы жекпе-жегім. Жеңіске жету үшін бар күшімді саламын және қазақстандық жанкүйерлерді қуанту үшін өзімнің ең жақсы қасиеттерімді көрсетуге тырысамын. АҚШ-тағы оқу-жаттығу жиынынан кейін жекпе-жек өткізуім керек болды. Әуесқойлар арасында өнер көрсетуді жалғастырамын. Мен де кез келген спортшы секілді Олимпиада ойындарында жеңіске жетуді армандаймын», — деді Санжар Ташкенбай.

Сондай-ақ турнир аясында Сәкен Бибосынов (2-0, 1 КО) кәсіпқой бокстағы үшінші жекпе-жегін өткізеді. Оның қарсыласы Намибия өкілі Иммануэль Джозеф (18-4-1, 7 КО) болады.

Тікелей трансляция Қазақстан уақытымен 18:00-де басталады. Оны YouTube платформасынан көруге болады.